Marloqiusamik qinigaaffeqarneq iluarinngilaa
- Ataatsikkut Inatsisartuni folketingimilu qinikkatut sulinissaq Supermanilluunniit sapissagaa ilimagaara, taamaattumillu marlunnik suliffeqarnissamut sapiutinnginnerartut qineqqusaarniaannartuupput issiavimminnut nippusimaniat, Inatsisartuni ilaasortaajutigalutik folketingimut qinigassanngortinniartunik KNR-ip saqqummiussaqarneranut taama qisuariaateqarluni Ole Aggu Markussen allagaqarpoq.
Folketingimut Siumut sinnerlugu Ole Aggu Markussen-ip qinigassanngorteqatigaa Inatsisartuni ilaasortaq Doris Jakobsen. Kiisalu nunarput sinnerlugu folketingimi ilaasortaasup aappaa, Kuupik Kleist Inuit Ataqatigiinneersoq aamma Inatsisartuni ilaasortaajutigaluni folketingimi ilaasortaavoq.
Doris Jakobsenillu radioaviisimut erseqqissarpaa folketingimut qinigaassangaluaruni Inatsisartunut sassaqqissanani.
Atassutittaaq siulittaasua inatsisartunilu ilaasortaq Augusta Salling folketingimut qinigassanngortippoq. Augusta Sallingilu isumaqarpoq qinigassaangaluaruni suliat marluit ingerlassinnaalluarini, piffissaq tamaat folketingimi ataatsimiinnernut atorneqarneq ajormat.
Taamatulli isumaqarneq suliamik paatsuuinerusoq Ole Aggu Markussen oqarpoq.
