Marloqiusamik akileraartannginnissaq pillugu isumaqatigiinnialerput
Sverigemi nunat avaannarliit suleqatigiinnerannut ministeri
Cristina Husmark Pehrson oqarpoq Kalaallit Nunaata Sverigellu
akornini marloqiusamik akileraartoqartannginnissaannik isumaqatigiissummik oqaloqatigiinnissat pisariaqartoq paasitineqarsimalluni.
Tassa imaappoq suliffeqarfiit namminersortut inuillu ataatsiakkat nunani taakkunani suliaqartut marloriaammik akileraartannginnissaat isumaqatigiissutigineqassasoq aammalu akileraarusersuinermi maleruagassat ersarissarneqassapput.
Taamaasiornikkut soorlu aatsitassarsiormi Svenskit sullivii nunatsinni aningaasaliinissaminnut soqutiginninnerulersinniarneqassapput, taakkualu
saniatigut peqqinnissaqarfimmi sverigimiit nakorsat, kigutit nakorsaat peqqissaasullu amigaataaqisut suliartornisaminnut soqutiginninnerulersinnaassasut, Akileraartarnermut Aqutsisoqarfimmi pisortaq Claus Stensgaard Jensen oqarpoq.
Aningaasaqarnermut Naalakkersuisoq Palle Christiansen oqarpoq
marloqiusamik akileraartannginnissaq pillugu isumaqatigiissut nunatsinni aningaasaliiumassusermut iluaqutaasinnaasoq.
Nangillunilu oqarpoq Seqqimi olivinimik piiaavik qiviassagutsigu Svenskit ingerlatseqatigiiffiat suliamik ingerlatsisuusoq, Svenskillu aatsiatassarsiornermi piginnaaneqarluartut. Siunissamilu akileraartarneq pillugu isumaqatigiissuteqarnikkut Svenskit nunatsinni suliffinnut nutaanut aningaasaliiumanerat aqqutissiuunneqarsinnaavoq.
Maannamut Kalaallit Nunaata Danmarki, Norge, Savalimmiut Islandilu marloqiusamik akileraartanngissaq pillugu isumaqatigiissuteqarfigai. Anguniagaavorlu Nunat avannarliit tamaasa isumaqatigiissuteqarfiginissaat.