Marie Smith Jones toquvoq

Alaskami ilinniarnertuunngorniarfik, University af Alaska, ordbogiliormat Marie Smith Jones ikiuussimavoq, ordbogiliornermi anguniarneqarluni kinguaariit siunissami oqaatsinik allassimasunik pigisaqaannarnissaat. Nutaarsiassaqartitsivimmi BBC-mi taama allaaserinnittoqarpoq.

Marie Smith Jones Anchorage-imi angerlarsimaffimmini toquvoq. Arnaq taanna kisimi ukiuni kingullerni 15-ini Eyakisut oqalussinnaasutuaasimasoq ilimagineqarpoq.

Mary Smith Jones nunap inuiisa pisinnaatitaaffiinut illersuisuusimavoq. Uinilu qulingiluanik qitornartaarsimapput, taakkunanngalu arfineq-marluk suli ajunngillat, taakkuli Eyakisut oqalussinnaanngillat. Alaskamimi tuluttut oqaatsit kisimik atugaanerisa nalaani takku alliartorsimapput, oqaatsit allat Alaskami atorneqaraangata tamanna kukkunertut taamani isigineqartarsimasoq, BBC-mi allaaserinnittoqarpoq.