Marie Fleischer: Avannaa upalungaarsimaffigineqartariaqarpoq!
– Sooruna naalakkersuisut Ilulissani upalungaarsimaneq SAR juunimi juulimi aggustimilu matoriarlugu Narsarsuarmi ullormut akunnerit 24-t upalungaarsimasoqartussanngortikkaat, taama Marie Fleischer apeqquteqaammini aperivoq.
- Naalakkersuisut taamani ajunngitsumik aaqqiigaluarput Upalungaarsimaneq SAR Ilulissani Narsarsuarmilu sapaatip akunnerata ingerlanerani ullormut akunnerit 14-t ingerlattussanngortikkaluarmassuk.
– Ajunngitsumik ingerlasoqaraluarpoq kikkullu tamarmik toqqissillutik pillutik. Taamaattumik akuersaarneqarsinnaanngilaq naalakkersuisut maanna Upalungaarsimaneq SAR Ilulissani matoriarlugu Narsarsuaannarmi ingerlanneqartussanngortimmassuk.
Marie Fleischerip pissusissamisoorsorinngilaa Kalaallit Nunaata avannaa aasap ingerlanerani tamatuma tungaatigut annikillisaavigineqassappat.
– Naalakkersuisut Narsarsuarmi aasaanerani ullormut 24 tiimit upalungaarsimaneq SAR pingaartikkunikku taava Naalakkersuisut aalajangiinerup kingunissai tigusariaqarpaat, upalungaarsimanerlu SAR aningaasanik amerlanerusunik tunillugu taamaalilluni Ilulissani inuttassanik amerlanerusunik ikkussisoqarluni – pissutigalugu soorunami aamma avannaani aamma upalungaarsimasoqartariaqarmat, Marie Fleischer oqarpoq nangipporlu:
– Umiarsuit tikittussat aatsaat taama amerlatigaat – ilaatigullu ullormut tikittussat ataasiinnaasaratik, taamatut iliorneq Naalakkersuisut akisussaassuseqartutut nalilernerpaat? Marie Fleischer aperivoq.
– Nalunngilara Kalaallit Nunaanni upalungaarsimaneq SAR danskit naalagaaffiata akisussaaffigigaa. Naalakkersuisulli naalagaaffimmut aningaasanik amerlanernik pinissamut iluatsitsisimanngikkunik allatut ajornaqaaq nammineq aningaasaliisariaqarput, inuummi inuuneranik naleqarsinnaavoq, Marie Fleischer naggasiivoq.
