Margrete Johansen 1951-imi Danmarkiliaanneqarluni meeravissianngortitaavoq. Taassuma 1979 sioqqullugu meeriavissiartaat nunatsinneersut ilaquttavitik pillugit pisariinnerusumik paasissutissarsiorsinnaatitaalersinnissaat kajumissaarutigaa.Assi: Privat

Margretemut tapersersuisut: Meeravissiartaat pillugit paasissutissarsiortut ikiorneqartalerlik

Naalagaaffik meeravissiartaat nunatsinneersut angajoqqaaviminnik ujarlerneranni ikiuuttalertariaqartoq, Ilulissaniit Danmarkiliiaanneqarluni 1951-imi meeravissiartaarineqartoq Margrete Johansen isumaqarpoq.

Naalagaaffik meeravissiartaat nunatsinneersut ilaquttavitik pillugit paasissutissarsiorneranni ikiuunnerulertariaqarpoq.

Margrete Johansen taama isumaqarpoq. Taanna nunatta nunasiaanerani danskillu meeravissiartaarnermut inatsisaannik malinnittussaanerani nuliariinnit danskinit Ilulissaniit 1951-imi Danmarkiliaanneqarluni meeravissiartaarineqarpoq. 

Danmarkimi 1979-ip tungaanut meeravissiartaarnerit

Ilaqutariit iluanni meeravissiartaartitsineq nunatsinni ileqquunikuuvoq.

Meeraq angajoqqaavilu ilisarisimasariittarmata atassuteqartarmatalu tamanna ammasumik meeravissiartaartitsinermik taaneqartarpoq.

Danskit meeravissiartaarnermut inatsisaat nunatsinni 1923-mi atuutilerpoq. Inatsit taanna matoqqasumik meeravissiartaartitsinermut taamaallaat tunngavoq, tassa meeraq angajoqqaavilu atassuteqaqatigiinnissamik pisinnaatitaaffeerutivittarlutik.

Danskit meeravissiartaarnermut inatsisitaavat nunatsinni 1976-imi atuutilerpoq. Meeravissiartaarnermut maleruagassat tassani sukaterneqarlutillu nunatsinni matoqqasumik meeravissiartaartitsisarnerit amerlanerpaaffissalerneqarput.

Tusarfik: "Slægtskab og køn i grønlandske bysamfund - følelser af forbundethed", 2010 aamma naalagaaffiup nunatsinni sinniisoqarfia 

Taamaammallu naalagaaffik taamanikkut meeravissiartaanut nunatsinneersunut ikiuuttalertariaqarpoq.

- Naalagaaffimmit arlaatigut ikiuuteqalernissaa takorloorpara. Aningaasaatiguinnaanngitsoq, aammali ilisimasatigut nukissatigullu, Margrete Johansen oqarpoq.

Meeravissiartaat ilaquttavitik pillugit paasissutissarsiornerminni nukippassuarnik atuikkajummata tamanna pisariaqarpoq. Paasissutissarsiornermillu immikkut ilisimasallit paasissutissarsiortassasut, Margrete Johansen isumaqarpoq.

Asuliinnaq paasissutissarsiornerussan-ngilaq. Taamaaliornermi qasunartarpoq, taanna oqarpoq.

Rektori: Allagaatit meeravissiartaarnermut tunngasut qulaajaqqissaarsigit

Ilisimatusarfimmi rektorip inuup inuiaqatigiillu pissusiinik ilinniagartuup, Gitte Adler Reimerip, nunatsinni ilaqutariinnermut pissutsit misissuiffigisani ilisimatuutut 2010-mi allaatigai. Taamaaliornerminilu 1964-ip 1979-illu akornanni nalunaarsukkat meeravissiartaarnermut tunngasut qulaajarpai.

Kalaallit meerartaat 257-it nuliariinniit danskinit taamanikkut meeravissiartaarineqarsimasut qulaajaanermini paasivaa. Meeravissiartaarnerilli ilarpassui nalunaarsorneqarsimassangatinngimmagit, allagaatit meeravissiartaarnermut tunngasut qulaajaqqissaarneqartariaqarsorai.

- Allagaatit meeravissiartaarnermut tunngasut qulaajaqqissaarneqartariaqarsoraakka, Gitte Adler Reimer oqarpoq.

Danskit meeravissiartaarnermut taamanikkut inatsisaat naapertorlugu meeravissiartaarnerit, taakkualu kingunerisinnaasaat meeravissiartaat nunatsinneersut angajoqqaavisa ilarpassuisa ilisimasimanngikkaat, taanna isumaqarpoq.

Qitornaminnik meeravissianngortitsereernerminni qitornamik takunissaannut atassuteqarfigiinnarnissaannulluunniit pisinnaatitaaffeerunnertik tamakkiisumik ilisimasimanngikkaat nalunngilara. Tamanna allagaatit qulaajakkama ilarpaaluini ersarissoraara, Gitte Adler Reimer oqarpoq.

Atuakkiortup Iben Mondrupip allagaatit 1979 sioqqullugu meeravissiartaanut tunngasut taama amerlatiginerat, meeravissianngortitaanerannut tunngavigineqarsimasut taakkualu kinguneri aamma tupaallaatigai. Taassuma nuliariit danskit kalaallinik marlunnik meeravissiartaarnerat pillugu atuakkiani "Tabita" ukioq manna saqqummersippaa. 

Taassumalu allagaaterpaaluit meeravissiartaarnermut tunngasut atuakkiornermini qulaajarpai.

- Qulaajarnerini mamiatsappunga, inoqatinummi taamani isiginneriaaseq allaaneroqisoq tassa danskiuneq kalaaliunermit pitsaanerusoqineqaqisoq ersermat, Iben Mondrup oqarpoq.

Taamaammat meeravissianngortitaasimasut nunatsinneersut maanna inersimasut kissaataasa tusaaneqarnissaat akuerinissaallu piffissanngortoq, taanna isumaqarpoq.

Margrete Johansen: Utoqqatserfigineqarnermiit qutsavigineqarusunneruvunga

Danskit ministeriunerata, Mette Frederiksenip, meeqqani 1951-imi misiligaatigineqarsimasuni suli inuusut arfinillit utoqqatserfigeqqammerpai. Mette Frederiksenip meeravissiartaanut pisortatigoortumik utoqqatsernera Margrete Johansenip oqarnera naapertorlugu pingaarnerpaanngilaq.

Ilaquttat pillugit paasissutissarsivigisinnaasat

Nunatsinni meeravissiartaarnerit pillugit allagaatit amerlanerpaartaat naalagaaffiup Nuummi sinniisoqarfianit nunattalu allagaateqarfianit pissarsiarineqarsinnaapput.

Allagaatit nunatsinniit meeravissiartaartitsinernut tunngasut ilaat naalagaaffiup Nuummi sinniisoqarfianit aamma pissarsiarineqarsinnaapput.

Angajoqqaarsiat Danmarkimi najugaqarpata najugaqarsimappataluunniit, allagaatit naalagaaffiup allagaateqarfianit aamma pissarsiarineqarsinnaapput.

Allagaatit nuliariinnit danskinit ukiut kingulliit 75-it ingerlaneranni meeravissiartaanut tunngasut pissarsiarerusukkukkit, naalagaaffiup allagaateqarfianut qinnutigissavatit. Qinnuteqarnermut najoqqutassiaq uaniippoq.

Naalagaaffiup allagaateqarfia meeravissiartaanut nunatsinni ilaquttaminnik ujarlertunut DR-ip nangeqattaartuliaa "Forsvundne arvinger" aallaavigalugu najoqqutassiaqarpoq.

Tusarfik: Naalagaaffiup nunatsinni sinniisoqarfia, naalagaaffiup allagaateqarfia

Naalagaaffimmi nunatta Danmarkimut ukiorpassuit ingerlaneranni tunniussai soorlu meeravissianngortitat pillugit  qujaniartariaqaraluartoq, taanna isumaqarpoq.

Utoqqatseratik qutsavigisariaqarunaraluarpaatigut! Margrete Johansen oqarpoq.

Folketingimi ilaasortaq, Aaja Chemnitz Larsen (IA), 1979 sioqqullugu meeravissiartaat nunatsinneersut oqaluttuarisaanerannik qulaajaasoqarnissaanik danskit ministeriunerannut Mette Frederiksenimut siusinnerusukkut siunnersuuteqarpoq.

Meeravissiartaallu nunatsinneersut taakkualu ilaqutavii ikiorneqartalissasut, taanna aamma isumaqarpoq.

- Assersuutigalugu inatsisilerituumik ilaqutaviit pillugit paasissutissarsiornermut paasissutissarsereernermilu qanoq iliornissamut siunnersorteqartinnerisigut ikiorneqarsinnaapput, Aaja Chemnitz Larsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat