Maostit nassuerput
Qimuttuitsut sukkasuuliat Calcuttamiit Mumbayiliartut tassanngaannaq illinerminniit katammata ilaasut amerlanerpaat sinngussimapput. Qimuttuitsut illerngit saniliinut qimuttuitsut nassiussanik assartuutit qaangiutilersullu uppipput. Qimuttuitsut nassiussanik assartuutit qimuttuitsunut ilaasartaatinut aporput, uitsannersuarmik toqumillu kinguneqartumik.
Illerngit peerneqarsimanerat qaartitsinikkut imaluunniit qimuttuitsut aqqutaasa tunngaviata peerneqarsimaneranik pissuteqarnersut suli paasineqanngilaq, qularnanngilarli qimuttuitsut illerngi ajoqusiinianit taamaaliorneqarsimasut.
Qaammarmallu allagartat tusagassanik allagartallit maoistinit pikitsitsisartuneersut nassaarineqarput saassussinermullu maoistit pisuullutik nalunaarsimallutik. Dansk Industrimi siunnersortit pisortaat Ole Christensen ukiuni 40-ni Indiamik malinnaasimasoq oqaluttuarpoq, maoistit pikitsitsisartut naksalittinik taaneqartartut Indiallu killeqarfiata sinaani tikikkuminaatsuni aallaaveqartut ukiuni qulikkuutaani pissaaneqalerniarnertik sorsuutigisimagaat.
- Taakkua assut pissaaneqaleriartorlutillu siammariartorsimapput, sumiiffinni ikittuinnarneeriarlutik maanna naalagaaffiit ilaannut siaruarsimapput saassussisarnitillu annertusiartortillugit, Ole Christensen oqarpoq.
Naksalittit indiamiut sakkutuuinut immikkut sungiusarsimasunut apriilimi saassussipput inuillu 76-it toqullugit. Pikitsitsisartullu sapaatip akunnerisa ikittunnguit matuma siornatigut inuit 65-it toquppaat bussi pikitsitsartunit saassunneqarmat.
Indiami islamistit peqqarniisaarniartarnerat maani nunarsuup kitaani tusarfiginerusaraluarparput, maannali tassa maoistit tamanna tigusimagaat Ole Christensen oqarpoq.
Ministeriuneq Manmohan Singh ungasinngitsukkut oqarpoq tamanna Indiap isumannaatsuunissaanut ajornartorsiutit annersarigaat.