Maorit erfalasortaarniarput
New Zealandimi inuiattut ullumikkut ullorsiorput. Nuna tamakkerlugu naalagaaffiup erfalasui amoorarneqarsimapput.
Ukiorli ataaseq qaangiuppat – 2010-mi inuiattut ullorsiortoqalerpat naalagaaffiup erfalasulerfiini erfalasut ataatsimik ilaneqarsimassapput.
Tassami naalagaaffimmi innuttaasuni nunap inoqqaavisa maorit naminerisaminnik erfalasoqalernissaminnik kissaataat, New Zealandip ministeriunerata John Key-ip tapersersorpaa.
- Tamanna naalagaaffimmi innuttaasut aamma maorit ataqqeqatigiillutik inooqatigiinnerannut uppernarsaatitut isigaara, John Key, Aucklandimi tusagassiortunik katersortitsinermini ullumi taama oqarpoq.
Ministeriunerup Maorit erfalasuata nutaap aappaagu amuneqarsinnaanissaa sulissutiginiarpaa, taamaalilluni aappaagu februaarip arfernanni 2010-mi naalagaaffimmi innuttaasut nunallu inoqqaavisa ataatsimoornerat ataqqeqatigiinnerallu erfalasulerfinni takuneqarsinnaaniassammat.