Manna tikillugu Palæstinamiut 600-t sinneqartut Gazami toqutaareerput

Gazami illoqarfiit Israelimiut sorsuutaannit qulimiguuliinillu ullumi saassutarineqaqqipput, matumani Hamasikkut eqqorniarneqarlutik.
Allattoq Elisa Isaksen
januaarip 06-at 2009 16:56

Manna tikillugu Gazami Palæstinamiut 600-t sinneqartut toqutaareerput. Israelimiut sakkutuui Gazamut isaammatali sakkortusaarniat Hamas-ikkut 130-t toqutaasimasut Israelimiunit ilisimatitsissutigineqarpoq.

Ullumikkut saassussinerit sakkortunersaat pivoq, Naalagaaffiit Peqatigiit atuarfiat Gazamiittoq Israelimiut sorsuutaasa qaartartunik saassummassuk. Saassussinermi Palæstinamiut 42-t toqutaasut, napparsimmavinnit marlunnit nalunaarutigineqarpoq.

Palæstinamiut hunnorujulikkaat atuarfimmut qimarngusimapput, Israelimiut sakkutuuisa Palæstinamiullu Hamasimeersut akiuunnerannit qimarngullutik.