Manitobami ministerip USA tapersersorpaa
Nannut uumasut nungutaaqqajaasut allattorsimaffiannut USA-mit qaammatip siuliani ilanngunneqarmat, Canadami nunap immikkoortortaani Manitobami ministeriunerup Gary Doerip iluaraa, USA-llu naalagaaffimmut pissutsinut ministerianut Dirk Kempthorne-imut qujassuteqarluni. Canada.com-ip nittartagaani taama allaaserinnittoqarpoq.
Allattoq Louise M. Kleemann
juulip 02-at 2008 12:35
Nannut Manitobami Churchill-ip eqqaaniittut nungutaanissaat aarleqqutigineqarsinnaasoq Doerip oqaatigaa:
- Nannut pisarnerminnit siusinnerusukkut maanna nunamukartalerput, tassa sapaatip-akunnerinik pingasunik sioqqutsillutik nunamukartalernikuugamik. Taamaammat Dirk Kempthornep nannut pillugit aalajangiinera pissusissamisoortuuvoq, Manitobap ministeriunera oqarpoq.
Nannut uumasut nungutaaqqajaasut allattorsimaffiannut USA-mit ilanngunneqarnera Nunavummi Northwest Territoriesimilu naalakkersuisunit akerlilerneqarpoq, tamaani tammajuitsussarsiniarluni piniartitsisarnerup innarleqarsinnaanissaa aarleqqutigineqarmat.
