Maniitsup kommunea aningaasaateqaqaaq
Aningaasat 30 mio. koruuningajaat Maniitsup kommuniata karsiani maanna uninngasuutigineqarput. Aammattaaq 2007-mut naatsorsuutit inaarutaasa takutippaat Maniitsup kommunia 6,3 mio. koruuninik sinneqartooruteqartoq.
Allattoq Louise M. Kleemann
juunip 06-at 2008 09:42
Tamannalu ukiumut siulianut tassa 2006-imut naleqqiullugu pitsanngoriarfioqisoq unnersiutigineqarpoq.
Maniitsup borgmesteriata Søren Lyberthip ukioq 2007 Maniitsup kommunianut ukiuulluarsimasutut taavaa.
Taamatuttaaq Olivinisiorfik Seqi unnersiutigineqarpoq, Seqip ukiup annersaani sulisuni Maniitsuminngaanneersuunerusut sulisoriinnarsimavai taamaalillunilu kommunip innuttaanut suliffissaqartitsilluarsimalluni.
Ukiorpassuit ingerlanerini 2007 aatsaat taama ikitsigisunik Maniitsup kommuneani suliffissaaleqisoqarpoq, tassami 2007-p aasaanerani suliffissaaleqisut taamaallaat 2-3 procentiinnaapput.
