Maniitsup borgmesteria: Naalakkersuisut isiginngitsuusaarpaatigut!

Maniitsup borgmesteriata Søren Lyberthip naalakkersuisunut saaffiginnissutigisarsimasatik maannamut akineqarneq ajortut pillugit misigisimavoq naalakkersuisut maannakkut iliuuseqartariaqalersut, taamaanngippat maniitsormiunut ajortoortoqavittussaammat.

- Saaffiginnissutivut naalakkersuisunut ingerlasut nukinginnarluinnartutut isigalutigik taamatut maannakkut nalunaaruteqarpunga, misigisimagatta tassa maannakkut piffissami ulluni tulliuttuni akineqartariaqarluta, pingaartumik juullilernerata nalaani aalisartut piniartullu tunitsivissaarutivinnerata nalaani, tassami aalisartut piniartullu aamma ilaqutaqarmata, Søren Lyberth oqarpoq.

Tunisassiorfiup ingerlaannarnissaa qulakkeerniarlugu Maniitsup Kommunia saarullittassiissutissanik 1.600 tonsinik oktobarip qaammataani qinnuteqaraluarpoq, naalakkersuisulli maannamut akissuteqarsimanngillat. Aamma aalisartut allatut ajornartumik Kangaamiunut tunisiartortariaqalersut assartuinermut tapiiffigineqarnissamik qinnuteqaraluarput, maannamulli taanna akineqanngilaq. Aamma GLS-imi umimmaat neqaaat 20 tons tuniniarneqariaannaagaluarlutik uninngatiinnarneqarput, naalakkersuisulli tuniniaasinnaanermut suli akuersissuteqanngillat. Tamatuma kinguneraa GLS-ip tunisassiorfiani sulisut 13-it ullumi angerlartiinnarneqartariaqalernerat.

Naalakkersuisut Maniitsup Kommuniata saaffiginnissutai akinianngippatigik, maniitsormiunut tamanna ajorluinnartumik kinguneqassaaq, ilaqutariippassuillu nalorninartorsiorlutik juullisiornissaat Maniitsup borgmesteriata aarleqqutigaa:

- Tassami inatsisartut inatsisaat malillugit aalisartunut piniartunullu taamatut ikiuunnissatsinnut periarfissinneqanngilavut. Juullilerpoq, ilaqutariippassuit pineqarput, taamaattumik ajortoortoqavittussaavoq.

>Nunaqarfeqarpusi aamma, taakku aamma ajornartorsiutinik taamaattunik eqqorneqarnissaat ilimagineqarsinnaanerluni?<

- Tassami tusagassiuutitigut kingullertigut eqqartorneqarpoq Royal Greenlandip tunisassiorfini matoriaannaagai, tassanilu nunaqarfivut pingasuupput, Royal Greenlandilu marlunnik tassani tunitsiveqarpoq. Taamaattumik assersuutigalugu Kangaamiuniittoq matuneqassappat Maniitsup Kommunianiittut illoqarfimmiittut aamma tunitsivissaarutivittussaapput,

Maniitsup borgmesteria Søren Lyberth ernumaqisoq Radioaviisimut oqarpoq.