Maniitsumut suliartoqataasut ilaat suli inissarsissunneqanngillat

NUKA A/S-ip Nuummit Maniitsumut nuunneqarneranit qaammatingajak qaangiutereeraluartoq, sulisut nooqataasut arlallit inissaminnik suli tunineqarsimanngillat. NUKA-p qullersaqarfia marsip 21-ani nuunneqarpoq.

Sulisut arfineq-marluk nutaat, taakkunannga arfinillit Nuumminngaanneersuupput, maannamulli marluinnaat inissarsissunneqarsimallutik. Sinneri hotelimi Sømandshjemimilu ineqartinneqarput. NUKA-p pisortaanera Tønnes Berthelsen sulisunullu siunnersorti Kristine Sigurdsen A/S INI-p sulineranut sakkortuumik isornartorsiuipput.

- Inissiaatileqatigiiffiup neriorsuutini naammasisimanngilaa, Tønnes Berthelsen oqarpoq, erseqqissaatigalugulu sulisut inissaat piareersimassasut neriorsuutigineqarsimagaluartoq.

Sulisunut siunnersorti Maniitsumut nooqataasut aamma ilagaat, pissutsillu naammaginngilai.

- Uagutsinnut nutsertunut pakatsinaqaaq. Kristine Sigurdsen oqarpoq.

Sulisunut siunnersorti aamma erseqqissaavoq, NUKA inissiaatileqatigiiffimmut arlaleriarluni saaffiginnittarsimagaluartoq, maannamulli kinguneqanngitsumik. Inissiaatileqatigiiffimmi akisussaasoq oqaaseqartinniaraluaratsigu iluatsinngilarput.