Maniitsumiit kujammut timmisartuussineq inerteqqutaalerpoq
Timmisartoqqusiunnaarneq pingasunngorup unnuaanut atuutissaaq. Timmisartoqqusiunnaarnermut killiliussap sivitsorneqarnissaa Air Greenlandimit naatsorsuutigineqarpoq.
Air Greenlandip timmisartuinut ilaasussat bilitsiminnik utertitsinissaminnik neqeroorfigineqarput. Kujataanut angalanissamik inniminniisimasut piumagunik sinersortaammut Sarfaq Ittummut bilitsisinnaapput, oqarasuaat 34 91 90-mut imaluunniit www.aul.gl atorlugu saaffiginninnikkut. Tassungalu atatillugu umiarsuup Nuummiit kujammut aallarnissaa nalunaaqutaq 14.00-ip tungaanut Arctic Umiaq Linemit kinguartinneqarpoq.
Atlantikoq qulaallugu angallassineq suli inerteqqutigineqarpoq. Air Greenland nunatta Danmarkillu akornanni sapaatip akunnera timmisartuussisinnaasimanngilaq, Københavnimilu mittarfik qallunaat nunaanni nalunaaqutaq malillugu pingasunngornermi unnuakkut nal. 02 tikillugu matoqqassaaq.
Ilaasut ingerlaqqissinnaajunnaartut, unnuinissamut allanik periarfissaqanngitsut, unnuineri nerisaqarnerilu Air Greenlandip suli akilertarpai, tamannali ataasinngorpat ullaakkut atuukkunnaassasoq, Air Greenlandimit ilisimatitsissutigineqarpoq.
Air Greenlandip saaffiginnittarfia normua tassaavoq 34 33 35, ullaakkut nalunaaqutaq arfineq-pingasuniit unnukkut nalunaaqutaq arfineq-pingasut tu ngaanut ammasarpoq, aamma e-amilikkut kontakt@airgreenland.gl-mut saaffigineqarsinnaavoq.
