Maniitsumi utoqqaat iPaditaartinneqarput
VELUX FONDEN Maniitsumi utoqqaat peqatigiiffiannut 27.000 kr.-inik tunissuteqarniarluni aalajangersimavoq, aningaasallu iPadinik tallimanik qarasaasiamillu pisariaqartunik softwarelersukkamik pisinissamut atoneqassapput.
- Qeqqata Kommuniata atuilluartuunissamut suliniutaasa ilaannut peqataatinneqarpugut – taannalu ateqarpoq ”Utoqqaat qarasaasiamik ilinniartinneqarnerat". Taassuma siunertaraa utoqqaat innuttaaqataasut qarasaasianut tunngasunut ilinniartinneqarnissaat, Maniitsumi utoqqaat peqatigiiffianni siulittaasoq nassuiaavoq.
Kommunimi utoqqaat ilinniartinneqarnissarput utoqqaat inuussuttullu imminnut ilisarilersinnaanerannut ataatsimooqatigisinnaanerannullu aqqutaalluarsinnaavoq. Eqqarsaataavoq inuusuttut kajumissusertik tunngavigalu iPads-it atornissaannik qarasaasiallu allat atornissaannut ilinniartissagaativut inuusuttullumi taakku isumaqatigiissuteqarfigereerpavut taamaasiornissaannut. Taamaasillutik inuusuttut qarasaasianut/iPads-inut tunngasunut ilikkarsimasatik ingerlateqqissagaluarpaat. Akerlianik uagut utoqqaat inuunermi misilittakkatta ilaat ingerlateqqissinnaavagut taakkualu tamanut ilinniarfiullutillu nuannaarutaasinnaapput.
- Peqataasut tamarmik piumassuseqarpata sapiissuseqarpatalu suliniutip naammassilluarneqarnissaanut. Periarfissaq manna iluatsillugu, VELUX FONDEN Maniitsumi utoqqaat peqatigiiffiannut tunissuteqarnerannut qujaffigaara, Margrethe Lyberth nassuiaavoq.
