Maniitsumi tunitsiviit ajornartorsiorput
Maniitsumi aalisakkerivik Royal Greenlandip 1990-ikkut naalerneranni matummaguli, tunitsiviit innuttaasunit aalisartunillu ingerlanneqarput, tunitsiviilli ajornartorsiorluinnalersutut maanna taasariaqartut, inatsisartuni ilaasortap Peter Lyberthip, IA, Naalakkersuisunut apeqquteqaammini oqaatigaa.
septembarip 29-at 2009 07:07
Peter Lyberthip, Maniitsumi aalisakkanik tunitsiveqarneq ernumanartoqartippaa. Naalakkersuisunut qanoq iliuuseqarniarnersut apeqquteqaammini paaserusuppaa.
Neqinik amminillu tunioraaviup aamma ingerlasinnaajunnaarneratigut ajornartorsiutit aamma ikilinngitsut, Peter Lyberthip erseqqissaatigaa.
Maniitsumili Aalisartut Piniartullu Peqatigiiffiannit saaffiginnissut naapertorlugu maanna saarullilissuuvoq, saarulliillu ukioq-manna alleriarsimallutik.
Taamaammat Peter Lyberthip Naalakkersuisut kajumissaarpai tunisisinnaanermut periarfissat aaqqiivigeqqullugit, isumaqarami, ilaqutariippassuit inuuniarnerannut tamanna iluaqutaassasoq, aamma avammut tunisassiat amerlisinnaanerat periarfissinneqassagaluarluni.
