Maniitsumi suliffissarpassuit isumalluarfigineqarput

Naalakkersuisut akuersinerisigut Seqi Olivine A/S-p aatsitassamik olivinimik piiasinnaatitaalerpoq. Taamaliornikkut suliffiit ataavartussat 50-t sinnerlugit pilersinneqassapput. Aatsitassanut naalakkersuisoq Jørgen Wæver Johansen olivinimik piaalernissaq isumalluarfigaa: - Qularutissaanngilaq nunatsinnut aningaasatigut annertuumik qaffassaaqataassasoq. Sulisussaqarnikkullu Maniitsup kommunianut iluaqutaassaaq aamma, Jørgen Wæver Johansen oqarpoq.

Aatsitassaq olivin tonsimut 20 aamma 25 dollarit akornanni akeqarajuppoq. - Taamaammat ukiuni siullerni aningaasanik annertoorsuarmik isaatitsissutaanavianngilaq, kisianni suliffiit pilersitat amerlapput, kommunimut nunatsinnullu akileraarutinik isertitsissapput, Jørgen Wæver Johansen oqarpoq.

Svenskit aatsitassarsiortartut Minelco AB Seqi Olivine A/S-imi aktiat 51 procentiisa pisiariniarpaat, taamaalillutillu piginnittutut pingaarnersatut inississalluni.

Minelco AB-p ilimagaa ukiumut olivini 450.000 tonsit pisiarisassallugit.