Maniitsumi marlunnik toqutsineq: 22-nik ukiulik eqqarsartaatsimigut misissorneqassaaq

Angut 60-it sinnerlugit ukiulik arnarlu 50-it aallartinnerani ukioqartoq Maniitsumi savimmik kapineqarlutik toqunneqarsimasut decembarip 18-ani ullaassakkut nassaarineqarput.

Kingusinnerusukkullu ulloq taanna angut 22-nik ukiulik Maniitsumi politiinit tigusarineqarpoq eqqartuussivimmilu killisiorneqarluni aqaguani sassartinneqarpoq, tassanilu ulluni 28-ni tigummigallarneqarnissaa aalajangerneqarpoq.

AAMMA ATUARUK Angut 22-nik ukiulik Maniitsumi marlunnik toqutsisimasutut tigummigallagassanngortinneqartoq

- Toqutsisimanini ilaannakortumik nassuerutigaa. Kisianni eqqarsartaatsimigut misissorneqassaaq, Jesper Mortensen, Maniitsumi politiit sulineranni aqutsisoq oqarpoq.

Jesper Mortensenip ilanngullugu ilisimatitsissutigivaa politiit toqunneqartut timaanik misissuinermit nalunaarusiaangallartumik pisimasut.

- Toqusimasut timaannik misissuinermit nalunaarusiaq tamakkiisoq suli tigunngilarput, kisianni nalunaarusiaangallartoq naapertorlugu savimmik kapineqarnermik kingorna aaverlutik toqusimapput, Jesper Mortensen oqarpoq.

AAMMA ATUARUK Angut 22-nik ukiulik marlunnik toqutsisutut pasineqartoq tigusarineqartoq

Toqunneqartut timaat Danmarkimi misissorneqarsimapput. Toqunneqartut timaat Maniitsumut sapaatip akunnerata tulliani oqqunneqassasut politiit naatsorsuutigaat.

Jesper Mortensenip oqarnera naapertorlugu pasineqartoq aamma toqunneqartut toqqaannartumik imminnut attuumassuteqanngillat, imminnulli arlaatigut ilisarisimasimapput.

- Piffissaq ingerlangaatsiareerpat immaqa aatsaat eqqartuunneqassaaq, eqqarsartaatsimigummi Danmarkimi misissorneqarnissaa ilimanarpoq. Taamatullu misissuinerit ukiup affaanik sivisussuseqakkajuttarput, Jesper Mortensen oqarpoq.

Politiit Nuummeersut aamma Naalagaaffiup politiivinit pinerluttoqarsimatillugu misissuisartut Maniitsumi politiit suliami misissuineranni ikiuupput.