Maniitsumi ipilluni ajunaartoqarpoq
Maniitsumi politiit nalunaarput, angut 39-nik ukiulik Maniitsup avataani ippassaani ipilluni ajunaarsimasoq.
Politiit kutterimit ippassaani nalunaaqutaq sisamanngulivissoq nalunaarfigineqarput, umiatsiaaraq kivingajaqqasoq takuneqarsimasoq.
Politiit angallataat piaartumik aallartinneqarpoq, sulilu apuutinngitsoq nalunaarfigineqaqqppoq, angut ipisimasoq imaani nassaarineqarsimasoq. Angut pineqartoq nipisanniartilluni ipisimavoq.
Maniitsumi politeeqarfiup pisortaa Jens B. Frederiksen oqarpoq, umiatsiaaraq sarfarissumiitilluni ulikkaarpallaalersimagunarluni kivingajassimasoq.
Taamaattumik politeeqarfiup pisortaata aalisartunut piniartunullu inassutigaa, imaani angalasut tamarmik annanniutinik atallaarsuaqartaqqullugit.
- Pisimasoq una alianartoq taamaalilluni pinngitsoorneqarsinnaasimagunaraluarpoq. Jens B. Frederiksen oqarpoq.
