Maniitsumi innuttaasut Alcoa pillugu sunniuteqarniarput

Aalajangiinissanut innuttaasut nammineerlutik sunniisinnaanerat suleqatigiissittaliornikkut periarfissinneqarput.

Maniitsup eqqaani alumiiniumik aatsitsiviliornissamut suleqatigiissitami ilaasortaq Karl Lyberth suleqatigiissitaliorneq pillugu ima oqarpoq:

- Alumiiniumik aatsitsiviliornissaq eqqarsaatigalugu innuttaasut tamarmik eqqorneqartussaammata pisariaqartinneqarsimavoq suleqatigiissitanik aallartitsinissaq Karl Lyberth oqarpoq.

Suleqatigiissitaliat assigiingitsunut sisamanut agguarneqarput.

Ilinniartitaaneq suliffissaqarnerlu, infrastruktur aamma inissaqarneq, ilaqutariinneq sunngiffimmilu sammisassat, kulturi takornariaqarnerlu.

Suleqatigiissitat taakkua apeqqutit assigiinngitsut sammissavaat siunnersuuteqarlutillu, aalajangiisartut atorluarsinnaasaannik Karl Lyberth oqarpoq. Innuttaasut sunneeqataanerunissaat suleqatigiissitaliornikkut anguniarneqarpoq.

Alcoap Maniitsup eqqaani alumiiniumik aatsitsiviliorniarneq Maniitsormiut isumalluarfigisorujussuuvaat, suliffinnik nutaanik pilersitsiinnarani iluaqutissat assigiinngitsut periarfissinneqassapput, taamaattumillu Maniitsormiut isumalluarput, aluminiiniumillu aatsitsiviliornissamut akerliusunik suli tusarsimanani, Karl Lyberth oqarpoq.

Qeqqata kommunia immikkut atorfinitsitsivoq, suleqatigiit ataqatigiissarneqarnissannik suliaqartussaq.