Maniitsumi innuttaasut akerliussutsiminnik takutitsipput
Pisortat sullitaminnik sumiginnaapput.
Meeqqat pisinnaatitaaffiinik unioqqutitsisoqarpoq. Ilaatigut taamatut allaqqasunik allagartarsualisaartoqarluni akerliussutsimik takutitsisoqarpoq.
- Misigissutsit uani eqqartorneqanngillat, meerarli qitiutillugu pisortat siunissami sullissisarnissaat anguniarneqarpoq, Jan Boller akerliussutsimik takutitsinissamut pilersaarusiortoq nassuiaavoq.
Maniitsumi meerarsiaq pillugu Rigsombudip aalajangernera kiisalu Qeqqata Kommuniata suliamik ingerlatsinera akerliussutsimik takutitsisunit assersuutigineqarpoq.
Naalungiarsummut nukappiaqqamut qulinik qaammatilimmut angajoqqaarsiaasut Qeqqata Kommuniani ilaqutariinnermut ataatsimiititaliap siulittaasuanit, Bitten Heilmannimit, ilaqutariinnermullu pisortamit, Kesia Rasmussenimit, tallimanngormat allagarsipput, nalunaarfigineqarlutik, kommunip pisumik misissueqqikkallarnissaa, angajoqqaarsiaasullu oqaaseqarnissaat pissutigalugu, naalungiarsuup anaanavimminit aanaavanut tunniunneqarnissaa marsip ulluisa 16-iannut kinguartinneqarallartoq.
- Arlaatigut eqqunngitsumik suliamik ingerlatsisoqarsimavoq, meeqqamut ajunngitsussaq anguniarlugu akerliussutsimik takutitsivugut, Jan Boller oqarpoq. Neriullunilu Kalaallit Nunaanni taamatut siunissami pisoqaqqissanngitsoq.
