Maniitsumi inissiaq pingasunngornerup ullaassaani ikuallattoq.Assi: Karl Davidsen

Maniitsumi ikuallattoq: Najugaqartut ataatsimoortinneqannginnerat uparuarneqartoq

Najugaqartut itersarneqarput silamullu nillertumut anisikkallarneqarlutik inissiap ikuallattup qatserneqarnerani. Nuka Ole Berthelsenip najugaqartut allami katersuutsinneqannginnerat uparuarpaa.

- Tassa unnuaq marlup qeqqariartortoq ajunaarnersuaqarnerani siggartaatit appimmata itersarneqarpugut.

Nuka Ole Berthelsen, meeqqanut tallimanut ataataasoq, taama oqaluttuarpoq.

Taanna Maniitsumi inissiarsuarmi inissiamik nungulluni pingasunngornerup ullaassaani ikuallattoqarfiusumi najugaqarpoq. Inissiaq ikuallattoq 4. salimiittoq Nuka Ole Berthelsenikkut 1. salimi najugaqarput. Nuka Ole Berthelsenilu naapertorlugu ilaqutariit inigisaminnit qatserisartunit aneqquneqarsimapput.

- Tassa qatserisartuninngaanniit peqquneqarsimavugut anipallassasugut ikuallattup annertunera pissutigalugu, Nuka Ole Berthelsen oqarpoq.

Brand i Maniitsoq af Karl Davidsen

 

Tamatuma kingorna Nuka Ole Berthelsenip nuliatalu meeqqatik tallimat, pingasuniit 19-it tikillugit ukiullit, itersarpaat.

Tamarmillu inissiarsuup naqqata isuanukarput. Tassani inissiarsuarmi najugallit arlallit qatserisartut qamisaaneranni katersuussimapput. Tassaniinnerannilu Nuka Ole Berthelsen naapertorlugu sila nillersimavoq. Nalunaaquttallu akunnerata affaata missaani ilaqutariit silamiipput.

 

AAMMA ATUARUK Maniitsumi inissiaqarfissuarmi inissiat ilaat ikuallattoq

- Soorlu timersortarfik katersortarfilluunniit, taakkua arlaatigut katersuuffittut atorneqassangaluartut. Kisianni tassa taamaattoqanngilluinnarpoq. Assullu taanna isornartorujussuartut uanga taarusuppara. Pissutigalugu meerartaqaratta.

Kisianni Qeqqata Kommuniani upalungaarsimanermut pisortap tullersortaata, Morten Siegstadip, isornartorsiuineq ilisarisinnaanngilaa.

- Allat inissiap sunnerneqanngitsortaaniittunik aniatitsisimasut uanga ilisimasaqarfiginngilakka. Aamma akisussaaffigisinnaanngilakka taakkua inissiap sunnerneqanngitsortaanittut, Morten Siegtad oqarpoq.

Inissiammi nungulluni ikuallattup eqqaani inissiani najugallit kisimik Maniitsumi hotelimut inunnik isumagittoqarfimmit inissikkallarneqarsimapput.

- Aamma isumaginnittoqarfimminngaanniit inuit isumagineqarnissaannut suligasuartoqarpoq. Taakkualu suligasuarnerat ingerlapallattorujussuuvoq, Morten Siegstad oqarpoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat