Maniitsumi ikaartarfik nutaaq atoqqaarfissiorneqartoq
Qeqqata Kommunia naapertorlugu, pisuinnaat ikaartarfiannit aallartittumik pisuttuartarfiit nalunaaqutsersugaanissaat pilersaarutaavoq. Suliniutissaq tamanna Maniitsumi takornariartitsinerup siuarsarneqarnissaanut ilapittuutaasussaavoq mikisoq, pingaaruteqartussarli.
Pisuinnaat ikaartarfiat ersittumik takussutissaavoq innuttaasut kommunillu atituumik suleqatigiinnerannut. Suliniut innuttaasuneersuuvoq kommunimillu naammassineqarluni. Qeqqata Kommunia tusagassiorfinnut nalunaaruteqarluni taama allappoq.
Kommunimi borgmesterip tulliata ilaatigut utoqqaat peqatigiiffiat, Innuttaasut Suleqatigiissitaliaat aamma
aqqusinilerisut qutsavigai:
-Ikaartarfik siammasissumik iluaqutaaniartussaavoq. Innuttaasunut asimut pisuttuarusuttartunut iluaqutaasussaavoq, takornarianuttaaq tikeraanullu. Immikkut ittumik qutsavigaa Pilersitsivik, tassani ilinniartut
ikaartarfiliortuummata, Qeqqata Kommuniani borgmesterip tullia Gideon Lyberth tusagassiorfinnut nalunaarummi taama oqarpoq.