Maniitsormiut oqallikkumatupput
Innuttaasut peqqinnerulernissaanut innuttaasut peqataagusunnerat Maniitsumi innuttaasunik ataatsimiititsinermi sisamanngormat ingerlanneqartumi maluginiarlugu pissarsiaqarfigilluarlugulu ilaqutariinermut Peqqissutsimullu naalakkersuisoq Asii Chemnitz Narup oqarpoq.
-Inuppassuuput ataatsimiititsinermi takkussuusimasut. Innuttaasut peqqissuunissaanut suliniuteqarnermi innutaasut pisortanut utaqqiinarnatik peqataagusunnerat takullugu nuannerpoq, isummanillu pissarsiaqarluarpugut, Naalakkersuisunut ilaasortaq oqarpoq, oqaatsigaalu Maniitsumi ataatsimiititsinermi inuit 120-it missaat takkussimasut.
Ajornartorsiutit iliuuseqarfigineqartussat Maniitsumi saqqummiussuuneqartut tassaaput, imigassamik atueriaatsip allanngornissaa, persutaasarneq, atoqatigiinermut tunngasut, nerisat paarilluarnissaat, pujortarpallaarnerup annikillinissaa, imminortarnerullu pinaveersimatinniarnissaa aamma eqartorneqarlutik.
Peqqissuunissaq pillugu pilersaarusiaq Naalakkersuisut suliaralugu ingerlappaat, anguniarneqarmat pisortat kisimik pinnatik innuttaasullu peqataatilluinnarlugit tamanna anguniarneqartariaqartoq.
Ilaqutariinnermut peqqissutsimullu naalakkersuisoq Asii Chemnitz Narup Maniitsumi innuttaasunik ataatsimiititsereerluni unnugu Kangaamiuni ataatsimiititseqqittussaavoq.
