Maniitsoq Sisimiunut nuliarsarpoq

Maniitsup kommuneata Sisimiullu kommuniata suleqatigiinnialersaarnerat suli aalajangiulluarneqanngilaq. Maniitsup kommuniani borgmesteri Søren Lyberth oqarpoq, Maniitsup kommuniata Sisimiut kommunianut suleqatiginninnialersaarnertik aalajangiusimagitsik, Sisimiullu kommuniata aalajangernissaa utaqqiinnaritsik.

- Februaarip naalernerani Sisimiut kommuniata qanoq aalajangiisimanerluni tusarliuttussaavaa, Søren Lyberth oqarpoq.

Taanna erseqqissaavoq kommunit taakku marluk kattutivinngikkaluarlutik suleqatigiinnissaq pineqartoq.

Kommunit kattussuunnissaat siunnersuutigineqaleqqaarmat Kangaatsiap kommuniata Sisimiut Maniitsullu kommuniinut suleqatiginninnissaa siunnersuutigineqarpoq aammattaaq tunumi Tasiilaq Illoqqortoormiullu taaneqarsimallutik.

- Arsaq Kangaatsiap kommuniata tigummiliuk, soqutiginnikkunik namminneq siulliullutik saaffiginnissapput, Søren Lyberth oqarpoq.

Taanna aamma oqarpoq, tunumi illoqarfiit marluk Illoqqortoormiut Tasiilarlu suleqatigineqassappata ungasippallaarmata taamatut siunnersuuteqarneq piviusorsiortuunngitsoq.

Maniitsup kommunia 3.582-inik inoqarpoq, Sisimiullu kommunia 6.000-t missaanni inoqarluni. Inoqassutsikkullu naligiinneruneq kommuninit pingaartinneqarpoq, aammattaaq siunertaavoq kommunini nutaani innuttaasut ikinnerpaamik 8000-iussasut.

Kommunillu suleqatigiilissappata 2009-imi maajip aallaqqaataaniit tamanna aallartinneqassaaq.