Maniitsoq kiannerpaaffittut marlunngormat rekordiliiva?

Maannali Asiap - tassa Namminersorlutik Oqartussat silap pissusianut avatangiisinullu tunngasunik paasissutissanik katersuisuusup nalunaarutigaa, namminneq Maniitsumi silasiorfimminni uuttukkatik naapertorlugit Maniitsumi juulip 30-anni "taamaallaat" 24,0 gradi celsiusimik kiassimasoq, taamalu Kangerlussuarmi 1990-imili rekordiusoq 25,5 gradiusoq suli qaangerneqanngitsoq.

DMI-p aamma Asiap uuttuinerisa assigiinngissusaat, Asiamit nassuiarneqarpoq, DMI-p silasiornermini uuttuutai Maniitsumi mittarfeqarfimmi isaarissap eqqaaniinnerannik pissuteqartoq.

Taamaalilluni kiassutsimik uuttuisarfiup eqqaa tamarmik asfaltilersugaavoq, taamaalilluni soorlu marlunngornermisut seqinnarilluni anoreqartinnagu sila kiatsipallattaqisoq Asiamit oqaatigineqarluni.

Taamaattumik Asiap silasiornermut uuttuutai mittarfimmit 100 meterinik ungasinnerusumiipput, kiassuserlu avatangiisinit sunnersimaneqarpallaanngitsoq taamaalilluni uuttorneqarsinnaasoq, Asiameersoq Per Hangaard oqarpoq.

Rekordiliisoqarneranik nutaarsiassaq suli DMI-p nittartagaani atuarneqarsinnaavoq. John Cappelenip DMI-meersup ullaaq manna Radioaviisimut oqaatigaa, Maniitsumi ilumut kiannerpaaffimmik rekordiliisoqarsimanersoq DMI-mit maanna misissoqqissaarneqartoq