Maniitsoq FIFA-mit akuerisamik arsaattarfittaassava?
Qeqqata kommuniani politikerit Maniitsumi ivigaasaaqqanik qallersukkamik arsaattarfissap angissusissaa oqallisigileruttorpaat.
Maniitsumi arsaattarfiup pioreersup angissusaa 62 meteriusoq atorlugu ivigaasaaqqanik qallersorneqarpat tamanna nuna tamakkerlugu unamminernut atorneqarsinnaavoq.
Karl Lyberth, Siumut, Qeqqata Kommuniani kommunalbestyrelsimut ilaasortaq siunnersuuteqarpoq.
Taassuma maanna arsaattarfik pioreersoq allilerneqarluni FIFA-mit akuerisatut angissuseqartariaqarsoraa.
Siunnersuuteqartup arsaattarfiup eqqaaniittoq qaqqaq qaartinneqariarluni ujaqqat qaartinneqartumeersut angallatinut talittarfiliornermut atorneqarnissaat kissaatigaa.
Maniitsumi ivigaasaaqqanik qallersukkamik arsaattarfiliornissamut 10 millionit koruunit aappaagumut missingersuutinut kommunip immikkoortikkai, Qeqqata Kommuniani pisortaanerup, Paneeraq Olsenip KNR-imut paasissutissiissutigaa.
Aningaasallu taakku nunat tamalaat akornanni arsaattarfiit angissusaatut ittumik Maniitsumi isikkammik arsartartunut arsaattarfiliornissamut naammapput. Tamannali kissaatigineqarnersoq apeqqutaavoq.
Siunnersuut kommunalbestyrelsimi oktobarimi aappassaaneerneqarmat kommunalbestyrelsimi ilaasortat amerlanerussuteqartut itigartitsissutigaat, taamaammat siunnersuut Teknikkeqarnermut, Aatsitassanut Avatangiisinullu ataatsimiititaliamut suliareqqitassanngorlugu utertinneqarpoq.
Ataatsimiititaliap ivigaasaaqqanik qallersukkamik arsaattarfiliornissap qanoq akeqarnissaa maanna misissuiffigigaa, pisortaanerup oqaatigaa.
Arsaattarfiup eqqaaniittup qaqqap qaartiterneqarluni , FIFA-mit piumasaqaatigineqartutut, nunat tamalaat akornannit unammiffigineqarsinnaanngorsinnaanersoq arsaattarfilluunniit pioreersoq ivigaasaaqanik qallerneqassanersoq Aatsitassanut Avatangiisinullu ataatsimiititaliamut paasiniassavaa.
Siunnersuutigineqartoq Kalaallit Arsaattartut Kattuffiannut KAK-mut paasiniarneqarluni saqqummiunneqarpoq nunatsinnilu unammersuaarnernut aamma nunata tamalaat akornanni unammisartut unammersuaarnissaannut angissutsit piumasaqaataasut paasiniarneqarlutik.
Maniitsumi arsaattarfiup maanna angissusaa nunatsinni unammersuaarnernut atorneqarsinnaasoq, KAK-ip siulittaasuata, John Thorsenip ilisimatitsissutigaa.
Teknikkeqarnermut, Aatsitassanut, Avatangiisinullu ataatsimiititaliaq novembarip arfineq-aappaani ataatsimiissaaq, tassanilu ivigaaqqanik arsaattarfissaq qanoq angitigissanersoq aalajangiiffigissallugu. Tamatuma kingorna suliaq Kommunalbestyrelsip novembarip 23-ani ataatsimiinnerani oqalligineqaqqissaaq inaarutaasumillu aalajangiisoqassalluni