Aarhusimi Kalaallit Illuata pisortaa soraartoq
Kalaallit Illuat nittartakkamini paasissutissiivoq. Pisortatut soraarnera siulersullu illugiilluni isumaqatigiissutaavoq.
Jørn Holbech Tasiilap atuarfiani ukiuni arfineq-pingasuni pisortaareerluni Aarhusimi Kalaallit Illuani 2014-imi pisortanngorpoq. Taassuma Svend Kolte ukiuni 26-ni pisortaasimasoq taarsernikuuaa.
Siulersuisut Jørn Holbech suliarisimasaanut qujassuteqarput.
AAMMA ATUARUK Nukiga danskit aningaasanut inatsisissaannit aningaasaliiffigineqartoq
- Naalagaaffeqatigiinnerup iluani Kalaallit nunaat siammasissumik ilisimaneqarnerunissaa anguniarlugu Jørn Holbech takorluukkanik piviusunngortitsisinnaasimavoq ilaatigut NUKIGA aallartitsisuuffigalugu, siulersuisut illuutip nittartagaani allapput.
Nunatta kalaallillu kulturiata inuiaqatigiinni, inuussutissarsiornermi Danmarkimilu kulturikkut oqaluttuarineqarnerata ajunngitsuunissaanik siunertaqarluni ”NUKIGA” 2016-imi pilersinneqarpoq.
Suliniut danskit 2019-imit 2022-mut aningaasanut inatsisaanni aningaasanik taperneqarpoq.
Aarhusimi Kalaallit Illuat Jørn Holbechip pisortaanerani ilaatigut A.P. Møller og Hustru Chastine McKinney Møller Fondimit illuutip kulturikkut inersuaqalernissaanut allaffimmilu nutaanik avatangiiseqalernissamut alliliinissamut 6 millionit koruuninik aningaasanik tunineqarpoq.
AAMMA ATUARUK Kalaallit Illuutaat Aarhusimiittoq allilerneqalerpoq
Kalaallit Illuani init nutaat ukioq manna maajimi atulernissaat naatsorsuutigineqarpoq.
Kalaallit Illuani maanna pisortassarsiortoqaleruttortoq, siulersuisut paasissutissiipput. Atorfinittoqarnissaatalu tungaanut Benigne Fleischer pisortatut atuuffeqarallassaaq.
