Manchesterimi eqqugaasunut 85 millionit koruunit katersorneqartut

Nipilersortartut tusaamasat inuppassuillu peqqarniisaarniat ilaatigut akiorniarlugit Manchesterimi erinarsoqatigiipput.

Uumissuineq asanninneq atorlugu akiorneqarli, erinarsortartut ilaat Manchesterimi ajunaartut pillugit eqqaaniaalluni tusarnaartitsinermi inunnillu 50.000-init ikinnerunngitsunik peqataaffigineqartumi ippassaq oqarpoq.

AAMMA ATUARUK Eqqaaniaalluni tusarnaartitsineq TV 2-mi allakaatinneqassaaq

Ariana Grandeli kisimiilluni tusarnaartitsinngilaq.

Nipilersortartut nunarsuarmi tamarmi tusaamaneqarlutik nuannarineqartut ilaatigut Oasis, Coldplay, Katy Perry, Pharrel Williams, Miley Cyrus, Robbie Williams allarpassuillu BBC-kkut immiunneqartumik tusarnaartitseqataapput. 

Oqariartuutaallu ersarippoq:

- Manchesterimi nukittuvugut sulilu erinarsorpugut, Robbie Williams tusarnaariat taama erinarsoqatigai.

DR naapertorlugu tusarnaartitsinermi 10 millionit pundit, tassa 85 millionit koruunit katersorneqarsimapput.

AAMMA ATUARUK Londonimi saassussinermi arfineq marluk toqutaapput

Tuluit amerikamiullu nutaarsiassaqartitsivii naapertorlugit Ariana Grandep ajunaartut ilisaanerannut aningaasartuutaasussat aamma akilerumasimavai.