Mammografimik misissuut akissaqartinngilaat
Kalaallit Nunaanni peqqinnissaqarfiup mammografi-scannerimik pissarsisariaqarneranik, Neriuffiit Kattuffiata kræftimillu nappaatillip oqaaseqarnerannut atatillugu, nakorsaq Birgit Niclasen, Naalakkersuisoqarfimmi nakorsatut siunnersorti nassuiaateqarpoq.
- Arnat Kalaallit Nunaanni 50-ileereersimasut iviangitik tarrarsortillugit ukioq allortarlugu misissorneqassappata suliarujussuussaaq, akisoorujussuussallunilu, nakorsaq Birgit Niclasen, Naalakkersuisoqarfimmi nakorsatut siunnersorti KNR-imut oqarpoq.
Mammografi-scannerimik Nunatsinni inissiisoqassappat arnat Nunatsinniittut Nuummukartinneqarlutik scannerneqartassasut, taassuma oqaatigaa, taamatullu aaqqissuussisoqassappat aningaasartuutigineqartussat amerlassapput.
- Arnat 50-it sinnerlugit ukiullit Kalaallit Nunaanniittut qassiunersut eqqarsaatigeriarukkit, taakkulu affaat ukiut tamaasa misissorneqartassappata, tamannalu Nuummi pisassasoq, taava takorloorsinnaavat aningaasartuutit qanoq amerlatigissanersut. Atortunummi aningaasartuutit matumani kisimik pineqanngillat, atorneqalernerisigummi aningaasartuutissat aamma amerlassammata, Birgit Niclasen oqarpoq.
Arnat Danmarkimiittut 50-ileereersimasut mammografimik misissortinnissamut ukiut allortarlugit neqeroorfigineqartarput, taamatullu Nunatsinni siunissami aaqqissuussisoqarnissaanik peqqinnissaqarfimmiit mattussisoqanngilaq.
Kisianni arnat iviangiinik pinngitsoorani misissuisalernissamut ilisimasat maannamut naammanngitsut, Namminersorlutik Oqartussani nakorsatut siunnersorti, Birgit Niclasen naliliivoq.
- Suliassarujussuaq una piviusunngortinneqassappat, taava qulakkeertariaqarparput taama misissuineq arnamut misissortittumut inuiaqatigiinnulul iluaqutaassasoq, Birgit Niclasen oqarpoq.
Inuiaqatigiinnut arnamullu misissortittumut iluaqutaanersoq pillugu ilisimasavut suli ikippallaartut, taassuma erseqqissaatigaa.
- Mammografi atorlugu misissuinerit kræfteqartunut iluaqutaassappata, taava soorunami atorneqassaaq. Kræfteli pillugu nassuiaammi takuneqarsinnaavoq arnat Kalaallit Nunaanneersut katsorsarneqarnermikkut ajorunnaartartut Danmarkimisulli amerlatigisut, Namminersorlutik Oqartussani nakorsatut siunnersorti Birgit Niclasen oqarpoq.
Arnat misissugassamik tigusiffigineqarlutik Kalaallit Nunaanni ullumikkut misissorneqartarput, misissugassarlu Danmarkimut nassiunneqartarpoq sukumiinerusumik tassani misissorneqartarluni.
Arnaq kræfteqarnersoq kræfteqannginnersorluunniit paasiniaraanni sapaatip-akunneri arlallit utaqqisoqaqqaarsinnaasarluni.
Peqatigiiffik Neriuffik mammografi-scannerimik peqqinnissaqarfimmut 2009-mi tunissuteqarniaraluarpoq, Peqqinnissaqarfilli taamanikkut qujaannartariaqarsimavoq, mammografi-scanneri atorlugu misissuisarnissat Peqqinnissaqarfimmut, taamalu inuiaqatigiinnut, akisuallaarnissaat taamanikkut tunngavilersuutigineqarluni. Peqqissutsimut Naalakkersuisoqarfimmiit taama ilisimatitsisoqarpoq.
