Mamakujuttunik inerteqquteqarnissaq oqallisigissavaat
Siumut sinnerlugu kommunalbestyrelsemut ilaasortaq Karl Lyberth siunnersuummik saqqummiussisuuvoq. Taassuma isumassarsiffigaa Kommuneqarfik Sermersuumi periuseq atorneqalertussaq. Ukioq atuarfiusoq nutaaq aallartippat mamakujuttut sodavandillu atuarfimmut eqqunnissaat tassani inerteqqutaalertussaavoq.
Taamatullu Qeqqata kommuniani aaqqissuussisoqarnissaa Karl Lyberthip kissaatigaa. Siunnersuut oqaluuserineqartussanngorpoq Qeqqani kommunalbestyrelse ileqquusumik juunip 16-at ataatsimiilerpat.
Karl Lyberthip siunnersuutaa akuerineqassasoq inassutigineqarpoq aammalu Ilinniartitaanermut Kulturimut Sunngiffimmullu ataatsimiititaliami suliarineqassalluni.