Mamakujunnut sikunullu Eskimo-p taaguutaanera ajoraa
Takornariap canadamiup New Zealandimiitilluni tupaallaatigisimavaa innuttaasut mamatuaarutaasa mamarineqarnerpaat ilaat Eskimomik taaguuteqartinneqarmata.
apriilip 21-at 2009 13:27
Mamakujuttut poortamiittut taaguuteqartinneqarput Eskimos, sikulu sukkulaamik qalligaq taaguuteqartinneqarluni Eskimo Pie.
- Ammip qalipaataanik immikkoortitsineruvoq mitalliinerullunilu, Seeka Parsons, New Zealandimi takornariartoq, oqarpoq.
Seeka Parsons Canadap naalakkersuisuinut, aataminullu Inuit siuttuisa ilaannut, naammagittaalliuuteqarsimasoq, New Zealandimi tusagassaqartitsiviit nalunaarput.
Nioqqutissiortulli taaguuteqartitsinerisa allanngornissaat ilimananngilaq. Mamakujuttuliortartut Cadbury/Pascall ukiuni 54-ini kingullerni mamakujuliarisimasamik Eskimosip taaguutaa allanngortinnianngilaat. Sikuliortuttaaq suli sivisunerusumik tuniniartagarisamik taaguutaata allanngortinnissaanut pilersaaruteqanngillat.
