Mamakuijuit akitsuutaat

Ullumikkut nunarsuaq tamakkerlugu sukkornermik nappaatillit ulloraat, tamannalu malunnartinniarlugu nunarsuatsinni sumiiffiit ilaanni malunnartinniarneqarpoq.

Nunatsinni peqqinnanngitsunik nerisaqartarnerup kingunerisaanik nappateqalertarnerup annertuallaaleriartornera pinaveersimatinniarlugu pisiassat ilaat akitsuuserniarneqalerput. Tamanna pillugu Inuussutisarsiorneq pillugu Naalakkersuisoq Johan Lund Olsen ima oqarpoq.

-Amerlanerussuteqartunit tassa pingaartumik Inuit Ataqatigiinnit aammalu Siumumit kissaatigineqarpoq peqqinnanngitsunik nerisaqarnerput sunnerniarneqarsinnaasoq peqqinnanngitsut akitsuusernerisigut. Taamaaliornissap aqqutissiornissaata pimoorussamik misissorneqarnissaa aalajanerneqarpoq, soorlu sodavandit naatsiiallu panertut akitsuusernerisigut kalaalimerngit akikillinissaanut aqqutissiuunneqarsinnaalissapput.

Akitsuusiineq aqqutigalugu peqqinnanngitsunik nerisaqarnerup annikillisinngitsoorneqarpat annertuumik paasisitsiniaaneq ingerlanneqassasoq

Inuussutissarsiornermut Naalakkersuisup Johan Lund Olsen-ip oqaatigaa.

Akitsuutit aqqutiginagit pinaveersaartitsinerli aqqutigineqassasoq illuatungiliuttunit Atassummeersumit Finn Karlsen-ip kissaatigigaluarpaa.

- Uagut peqqinnanngitsut taakkua akitsuusiinnarlugit pinaveersaartitsisinnaaneq upperinngilarput, suulluunniit akitsuusiallallugit pinaveersaartitsissutitut iluaqutaaneq ajormata. Meeqqaniit aallartilluni paasisitsiniaaneq aallartinneqarpat pitsaanerussaaq. Soorlu pujortartarneq eqqarsaatigalugu paasisitsiniutigineqarmat annertuumik pujortartarneq annikillisinneqarpoq. Akitsuusersuineq iluaqutaanavianngilaq, tamanna tamatta nalunngilarput, taamaallaat Nunatta karsianut iluaqutaassaaq. Nunatta karsia aningaasanik aallerfissaaruppat aatsaat akitsuusersuinissap atorneqarnissaa uagut kissaatigaarput. Atassut sinnerlugu Inatsisartuni ilaasortaq Finn Karlsen naggasiivoq.