Maluginiarneqarnertik tulluussimaarutigaat
- Tulluusimaarnarpoq taama annertutigisumik immikkut sunnersinnaasimagatsigu. Asuliinnaanngitsumik suliniuterput taamaalilluni saqqummerpoq, Charlotte Fencker Noahsen, Nuummeersoq, Radioaviisimut oqarpoq.
Aamma neriuutigaa Hans Enoksenip sunnertissimaarnera oqaasiinnartigut pissanngitsoq, ukiumilu nutaami sunniuteqarluarumaartoq.
Suliniaqatigiinniit pilersaarutigineqarpoq januaarip ingerlanerani peqatigiiffiliornissaq:
- Meeqqat allanik illersortissaqanngillat, soorlu killissaq sumiinnersoq naluaat, taamaattumik inersimasut suliniarnerusariaqarput tamanna suaartaatigalugu, Charlotte Fencker Noahsen, Nuummeersoq Radioaviisimut oqarpoq.
Meeqqat pitsaanerusumik atugaqalernissaat anguniarlugu suleqatigiit maannakkut aqqanilinnik arnaannarnik ilaasortaqarpoq, angutinngooq aamma soorunami ilaasinnaapput.
