Mallorcami qaartartumeereqqittoqarpoq
Oqarasuaatikkut qaartartumeerinissamik ilimasaaruteqartoqareersorlu Mallorcami neriniartarfimmi isersimasut tamarmik sapaammi ualikkut aniatinneqarput, tamannalu ajoqusertoqannginneranut pissutaavoq.
Qaartartoq Restaurante la Rigolettami Palma de Mallorcamiittoq inuerutereersorlu qaarpoq, ajoqusertoqanngilarlu, El Mundo nittartakkamini allaaserinnippoq.
Tusarfiit ilaat oqaluttuarput qaartartoq nammattakkamiittoq anartarfiit ilaannut inissinneqarsimasoq.
Oqarasuaatikkut ilimasaarisut oqarsimaneragaapput, Spaniap avannaani Baskerit nunamik namminersortunngortitsiniaqatigiit ETA qaartartumeerinissamut akisussaasut.
Qaartartumeerineq pivoq, Baskerit aviisiat Gara ullumi ulloq allaaserinnereersorlu, Spaniami qaartartumeerinernut, aamma Mallorcami juulip ulluisa 30-anni politiit najugaqarfianni pisumi - politiit marluk toqutaaffianni - ETA akisussaasuusoq.
