Nunatsinni peqqinnissaqarfimmut suliartorlutik tikittut tamarmik sulilinnginnerminni coronamut misissortittalissapput.Assi: KNR / Malik Brøns

Malittarisassat nutaat: Nunatsinni peqqinnissaqarfimmut suliartortut tikereernermini coronamut misissortittassapput

Nunatsinni peqqinnissaqarfimmut suliartorlutik tikittut sulilinnginnerminni coronamut misissortittassapput. Peqqinnissaqarfimmi sulisut marluk coronavirusimik tunillanneqarsimasut nunatsinnut tikereernerminni paasineqareersorlu tamanna aalajangerneqarpoq.

Nunatsinni peqqinnissaqarfimmut suliartorlutik tikittut toqqaannartumik sulilernissamut immikkut akuerineqarnissamik maannamut periarfissaqarput.

Tamannali periarfissaajunnaartoq, nunatta nakorsaanera Henrik L. Hansen oqarpoq. 

- Nunatsinnut suliartortut sulilinnginnerminni coronamik tunillanneqarsimannginnermut pinngitsooratik uppernarsaateqarnissaat piumasaqaataavoq, taanna oqarpoq.

Peqqinnissaqarfimmut suliartorlutik nunatsinnut tikittuni marluk coronavirusimik tunillanneqarsimasut, siulleq Aasianni kingullerlu Uummannami, ukiortaareersoq paasineqareersorlu, malittarisassat sukaterneqarput.

Peqqinnissaqarfimmi sulisup suleqatini qanillisimagai

Uummannami peqqissaavimmi sulisup suleqatini illoqarfimmi qanillisimagai taannalu coronavirusimik tunillanneqarsimasoq suli paasineqanngitsoq taamaaliorsimasoq, nakorsaaneq ilisimatitsivoq. Inunnilli allanik tunillanneqarsimasoqanngitsoq kingornatigut paasineqarpoq. 

- Tamanna ajunngitsumik maannamut kinguneqarpoq. Uummannami tuniluuttoqarataannaanissaa ilimagiunnaarparput, Henrik L. Hansen oqarpoq.

AAMMA ATUARUK Uummannami inuit ikinnerpaamik qulit tunillatsissimasumik uppernarsaasoqareernerani angerlarsimaannartut

Taamaakkaluartoq oqartussat malittarisassanik peqqinnissaqarfimmut suliartorlutik nunatsinnut tikittunut atuuttunik sukatereqqammerput. 

- Tamanna malittarisassanik atuuttunik qulaajaanitsinnik, taakkualu sukatertariaqarnerinik naliliinitsinnik kinguneqarpoq. Pisariaqartorlu nalilerparput, Henrik L. Hansen oqarpoq.

Malittarisassat nutaat ingerlaannarlutik atuutilerput. Taakkualu sulisunut innuttaasunut toqqaannartumik atassuteqartartunut allanut soorlu timmisartortartunut atuutilissanersut, oqartussat misissussavaat.

Tamannali tamakkiisumik suli aalajangiiffigineqanngilaq.

AAMMA ATUARUK Politiit: Uummannamut tunngatillugu angerlarsimaannaarnissamik unioqqutitsisoqanngilaq

Coronavirusimik nutaamik tuluit naalagaaffeqatigiffianni maanna tuniluuttoqarnera peqqutaalluni, coronavirusip nunatsinni siuaruaatilerataannaanera suli qaangiuteqqajanngilaq. Coronavirusilli nutaap nunatsinnut qaquguluunniit anngunnissaa ilimanaatilerujussuusoq, nakorsaaneq isumaqarpoq.

Taamaammallu siaruatsaaliinermut malittarisassat sukateqqippaat.

- Nunatsinni nappaalasoqarnissaa ingalassimaniarutsigu maannamit sakkortunerusumik killilersuisariaqarpugut, Henrik L. Hansen oqarpoq.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 19.065
  Tunillanneqarsimasut
30
  Peqqisseqqittutut nalunaarutigineqartut 30
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: Nunatsinni Nakorsaaneqarfik
  Nutarterneqarnera:
  februaarip 24-at 2021 nal. 11:00