Malittarisassat nutaat atuutilissapput

novembarip 03-at 2006 16:24

Uivertoqalernissaa, utaqqisorpassuaqalernissaa, timmisartullu kingusinaarlutik aallartarnissaat, Europami timmisartortitseqatigiinnit annilaanngatigineqarpoq, EU-mi isumannaatsuunissaq pillugu ilaasut nassataannut tigumiaannartakkanut malittarisassat nutaat ataasinngorpat atuutilerpata.

Tipigissaatit, quliutit, unngiareernermi sprittit assigisaallu puiaasaaqqanut immiuteriarlugit puussiaaqqanut akimut ersittunut poorneqartassapput.

Timmisartumut ilaasussat ikiartulerpata, isumannaatsuunissaq pillugu misissuisoqalerpat tamakkua kisinneqassapput, uuttorneqarlutik misissoqqissaarneqarlutillu.

Tamanna uivernersuarmik kinguneqassaaq, mittarfeqarfiit timmisartortitseqatigiiffiillu taama siulittuipput. Tassami malittarisassat nutaat ilaasussat naluaat, aamma soorlu puussiaaqqat akimut ersittut sumi pissarsiarissanerlugit nalugaat.

EU-mi malittarisassat nutaat peqqarniisaarniarnermut akiuiniarnermut atatillugu, savinnik qiuutinillu nassataqarnissamik inerteqquteqarnermut ilanngullugit atuutilersinneqassapput, taamaattorli malittarisassat nutaat pillugit angallannermik suliaqartut ileqimisaartuinnarput.

Kangerlussuarmi isumannaatsuunissamik suliaqartut pisortaat, Kurt Holm isumaqarpoq ataasinngorpat nunatsinni mittarfinni uivertoqarnavianngitsoq.

- Uivertoqarnissaa pinngitsoorniarlugu sapinngisatsinnik piareersarluarpugut. Puussiaaqqat piffissaagallartillugu pissarsiaraavut sinerissamilu mittarfinnut nassiussuutereerlugit. Ilaasussat uffarnermut atugassatik kuffertiminniitippatigit imigassaminnillu nassataqanngippata maani Kangerlussuarmi ajornartorsiorpallaarnavianngilagut, Kurt Holm oqarpoq.

- Arnaagaanni kusanarusuttoq taava siggunnut tarngutit sinngorsaatillu immikkut puussaannik peqarpugut, taakkununngalu pooriarlugit puussianut akimut ersittunut pooriarlugit nassarneqarsinnaapput.

- Aamma isumaqarpunga taamatut isumannaallisaaneq pitsaasuusoq, tassami taamaalilluta ilaasut imerpalasunik ikuallajasunik nassarsinnaanissaat pinngitsoortissinnaavarput, tamannalu ilaasunut toqqissisimanarneruvoq, Kurt Holm oqarpoq.