Arfininngorpamit imerniartarfinnut isersinnaasut tamarmik isersinnaaleqqissapput, inuimmi amerlanerpaamik 20-nik amerlassuseqaqqusaanerat nunatta annerpaartaani atorunnaarsinneqassaaq.Assi: Merete Lindstrøm

Malittarisassat nutaat arfininngorpamit ilisimasassatit aaku

Marloriarlutik kapitissimaguit taava immiaaqqamik tunineqarsinnaassaatit. Upernavimmi, Upernaviup nunaqarfiini Aasianniluunniit najugaqanngikkuit tamakkiisumik akiuussutisserneqarsimanerit arfininngorpamit uppernarsaqqaartassavat.

Coronamut malittarisassanik nutaanik sapaatip akunneraanngitsorluunniit saqqummertoqartarpoq.

Malittarisassat nutaat ilaasa qasukkarneqarnissaanut sapaatip akunnera aamma ingerlavallaarneq ajorpoq. Sapaatip akunnera una aamma taamaappoq.

Nunatta avannaani maannakkorpiaq aqunneqarsinnaanngitsumik tuniluuttoqarfiusumiinngikkuit arlalinnik eqqumaffigisassaqarputit.

Aasianni, Upernavimmi Upernaviullu qanittuani inuit 20-nit amerlanerusut katersuuteqqusaanngillat tamanillu ornigarfigineqarsinnaasuni kikkut tamarmik qanermut assiaquteqassapput.

Malittarisassat taakku nunatta sinnerani arfininngorneq juulip 31-iannit atorunnaarsinneqassapput.

AAMMA ATUARUK Corona pissutigalugu killilersuinerit Upernavimmi Aasiannilu atuutiinnassasut

Taamaakkaluartorli Nuummi Daddysimut imaluunniit Ilulissani Hotel Arcticimi neriniartarfimmut arfinninngorpamit imaaliallaannaq isersinnaanavianngilatit. Naak neriniartarfiit, sutorniartarfiit imerniartarfiillu inissaqassuseq malillugu isertitseqqissinnaalissagaluartut tamakkiisumik akiuussuserneqarsimanerit uppernarsarsinnaasariaqarpat.

Tassa imaappoq inuit tamakkiisumik akiuussuserneqarsimanngitsut imerniartarfimmut imaluunniit neriniartarfimmut iseqqusaanavianngillat, aamma timersornermi unammiuaarnermi kulturikkulluunniit neqeroorutinut – naatsumik oqaatigalugu tamanit orninneqarsinnaasunut peqataasinnaassanngillat.

Uppernarsaat suna takutissaviuk?

Naggammik akiuussuserneqareersimaguit sullisivik.gl aqqutigalugu paasissutissat danskit coronapasianut ilanngutitinneqarnissaannut piumasaqarsinnaavutit.

Coronapas appstorekkut playbutikkikkulluunniit aasinnaavat.

Qarasaasianik atuivallaartanngikkuit akiuussutisserneqarsimanermut paasissutissat e-boksinnut pdf-inngorlugit nassiunneqarnissaat piumasinnaavat. Taanna anillatseriarlugu kaasarfimmiorsinnaavat.

Aamma allamik ajornanngitsunnguamik periarfissaqarpoq: Akiuussuserneqarlerninni pappiaraq atinnik kapitinnernullu piffissamik allagartaqartoq aamma tigummiinnarsinnaavat.

Tamanit iserneqarsinnaasut suuppat?

Piffiit tamanit iserneqarsinnaasut tassaapput neriniartarfiit, atuakkanik atorniartarfiit, timersornermik aaqqissuussinerit suliffeqarfiit allallu.

Pisiniarfinnulli isernissannut uppernarsaammik aamma takutitsisassanersutit suli nalunarpoq.

Tamanit ornigarneqarsinnaasut sorlerpiaat pineqarnersut aatsaat ullumi nassuiarneqassapput., Corona pillugu aqutsisoqarfimmi siulittaasoq, Hans-Peder Barlach oqarpoq.

Akiuussuserneqarsimaninnut uppernarsaat kimut takutissaviuk?

Pisiniarfiit uppernarsaammik takunnikkusunnerlutik namminneq aalajangissavaat. Politiilli sumiiffimmiikkunik uppernarsaat takujumassavaat.

Isummersuutit

Nunatsinni coronavirusi pillugu
killiffik

Tunillatseqqasut 126  
Ullumi tunillatsittut 35  
Siullermik kapitissimasut 40.955  
Aappassaa kapitissimasut 35.924  
Tunillanneqarsimasut 504  
Uninngasut 1  
Anersaartuuteqartitaasut 0  
Toqquteqartut 0  
corona.nun.gl-imi kisitsit takukkit  
   Nutarterneqarpoq: 
Septembarip 21-iat 12:00
 

Coronavirusimik tunillatsinissaq pinaveersaaruk