Malittarisassat malinneqartannginnerat Namminersorlutik Oqartussani nalinginnaavoq
- Allattuisussaatitaaneq allagaatinillu takunninnissamik piumaqaatit suliarineqarnissaannut piffissaliussat suliani pineqartuni marlunni malinneqarpiarsimannginnera ersarippoq.
Julie Rademackerip atorfinitsinneqarneranut Andreas Salmonyllu soraarsitaaneranut atatillugu nalunaarusiami Namminersorlutik suliaritissimasaanni isornartorsiuineq taama ersaritsigaaq.
Taamaakkaluartoq eqqartuussissulerisup Niels Hansen Dammip, nalunaarusiamik suliarinnittuusup, tamanna eqqumiitsortaqarsorinngilaa.
Ajornartorsiutip takornartaannginnera aamma erseqqissaatigaa.
Suliaq aallartippoq, Julie Rademacherip Danmarkimut angalaqataaneranut atatillugu aningaasartuutit pillugit KNR apriilip 23-iani allagaatinik takunninnissamik piumasaqaateqarmat, kingorna aamma aviisit Palle Christiansenilu piumasaqaateqarput. Piumasaqaatit tamaasa kinguartiterneqarput ullunillu qulinik akinissamut piffissaliussaq malinneqarani.
KNR piumasaqaateqarnermini maajip 31-iani akissutissarsiavoq, piumasaqaatip nassiunneqarneranit ullut 38-t ingerlareersullu.
Nalunaarusiaq Namminersorlutik Oqartussat suliaritissimasaat naapertolugu tamanna eqqumiitsortaqanngilaq. Namminersorlutik Oqartussanili qanoq sulisoqartarneranut takussutaaginnarpoq.
