Malissuarneranit qaammatit marluk qaangiuttut: Naajaarmiut aalisartut ikiorserneqassanngillat

Angallatit sillimmasernissaat aalisartut namminneq akisussaaffigaat Avannaata Kommuniani borgmesteri oqarpoq.

Upernaviup nunaqarfiisa ilaanni Naajaani iluliaq sequmimmat malissuarujussuarmalli ippassaq qaammatit marluk qaangiupput.

Iluliaq unnuaannaq sequmippoq, taamaammallu aalisartut umiatsiatik malimmit amuneqarnerannit angumerinngilaat.

- Umiatsiat tamarmik atorsinnaajunnaarnikuupput. Ilaasa aquuteralattaat kittorartiterlutik ilai aserortiterlutik qanorileriaqqissinaajunnaarlutik, aalisartoq piniartorlu 57-inik ukiulik Anthon Grim oqarpoq.

Naajaat pillugit paasissutissat

* Naajaat Upernavimmit avannamut kangisissumi 40 kilometeritut ungasitsigisumi qeqertami inissisimavoq

* 49-inik innuttaasoqarpoq illuni 20-ni najugaqarlutik

* Qaleralinniarneq pingaarnertut inuussutissarsiutaavoq

AAMMA ATUARUK Høje bølger i Naajaat: Hel fangerfamilie har mistet joller

Taama pisoqaqqammitsiartoq Avannaata Kommuniani borgmesteri neriulersitsigaluarpoq.

- Tassa massakkut misissorneqarpoq sillimmasiisarfinni qanoq inissisimasoqarnersoq, kisianni aarleqqutigivara pinngortitap kingunerisaanik ajunaartoqaraangat sillimmasiisarfimmit taarsiisoqarsinnaanera ajornakusoortutut inissisimagunarami, taamaattumik taanna pillugu Namminersorlutik Oqartussat oqaloqatigisariaqarpagut qanoq iliussanerluta, borgmesteri Palle Jerimiassen juullinngitsiartoq KNR-imut taama oqarpoq.

Pisoq ajunaarnersuartut naqissuserneqanngitsoq Naalakkersuisut inerniliuppaat, taakkulu inerniliinerat aallaavigalugu Avannaata Kommunia allatigut ikiueqqissinnaanngilaq.

- Namminneq sillimmasersimasussaavaat. Uagut tassuunakkut ikiorsiisinnaanngilagut inuit namminneq akisussaaffigimmasigit, borgmesteri Palle Jerimiassen oqarpoq.

Naajaani pisiniarfeqaranilu allakkeriveqanngilaq. Najugaqartut nunaqarfimmut allamut qaninnerpaamut, Innaarsunnut Naajaanit kilometerinik aqqaneq-marluk kangisitsigisumut, pisiniartarput. Taamaalillutik angallatiminnik isumalluuteqangaatsiartuullutik.

AAMMA ATUARUK Borgmesteri: Naajaani ikiorsiinerit pisussaaffik malillugu ingerlanneqarput

Aalisartullumi pisaminnik nunaqarfimmut qaninnerpaamut tunisiartortarput.

Januaarip qaammataani Naajaat sikoqanngilaq, aalisartullu umiatsiaarartut aalisarsinnaanatik igalaakkut isiginnaaginnartariaqarsimapput.

Borgmesteri: Kikkut tamaasa assigiimmik pisariaqarpagut

Januaari naanerani Naajaani sikuvoq. Aalisartut qimussimik qamuteralannilluunniit aatsaat aalisaqqissinnaalerput.

Pinngortitarlu peqqarniissinnaasarmat, iluliarsuit sequmittarneri nalinginnaasuummata piareersimaffigineqartariaqarpoq borgmesteri oqarpoq.

- Assersuutigilara maani (Ilulissat aaqq.) aserussappat imaluunniit uummannami, taamaattoqartarami. Taava tassuunakkut Naajaarmiunut taarsiiniarutta aamma kommunip sinneranut taama pisoqaraangat taarsiisalertussaassuugut. Taamaassinnaannginnami, inuit namminneq angallatiminnik isumaginnittuupput piginnittuullutillu. Taamaattumik ajutoornermi namminneq isumagisussaavaat sillimmasiinissaq, Avannaata Kommuniani borgmesteri Palle Jerimiassen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat