Malimmi qaannamik polorlutik unammisut

Iligiiaat arfinilillit 27-inik inuttaqartut nalunaaquttap akunnerini arfinilinni unammipput, isiginnaariallu aliikkusersorneqarluarput ajuunnerillu 90-it missaaniissimallutik. Nuummi Naluttartut Klubbiat ukiut pingasussaat taamatut unammisaqattaartitsivoq.

Iligiit Ole Ziemer, Lars Kirkegaard, Anders D. Nielsen aamma Steen Haning ullorissaaqalutik ajugaaniutivinnermi iligiit Kia Hoffgaard, med Pavia Lyberth, Jette Vester aamma Mikkel Wulff ajugaaffigaat. Nr. 3-nngorput iligiit Jesper Labansen, Jakob Larsen, Jesper B. Jensen aamma Jane Schneider. Jakob Larsen aqqanilinnik ajuttuulluni ajuunnerpaavoq.

Nuummi naluttartut klubbiata ukiuni qulini atuuffiani qaammamik polorneq aallunneqartuarsimavoq. Qaffasissutsini pingasuni sapaatit akunneranut pingasoriarluni sungiusartoqartarpoq: ataasinngornikkut “sungiusimanerit”, marlunngornermi “aallarterlaat” sisamanngornermilu “pikkorivissut”. Kalaallit qajaat timersuummi nutaaliaasumi nuannerluinnartumik atorneqarpoq, ilaatigullu assammik arsaannermut assersuuinneqarsinnaalluni, naluttarfimmi ingerlanneqaannarluni. Qaannamik polorneq nunarsuarmi timersuutit atugaaleriartortut sukkanersaraat qasujaalluarnissamik naleqqersorluarsinnaassuseqarnissamillu pisariaqartitsisoq. Ajuuffiit meterinik marlunnik portussuseqarput iligiikkuutaallu sisamanik tallimanilluunniit inuttaqartarlutik (unammiffiup angissusaa apeqqutaatillugu).

Qaannamik polorneq misilikkusukkaanni (imaluunniit qaannamik misiliiginnarusukkaanni) Maji Nuanimut atatillugu aaqqiissuussinermi maajip arfineq aappaani nal 20.15-imit 22.00-imut ingerlanneqartussami tamanna periarfissaqassaaq. Atisanik naluutissanik tujuuluaqqamillu masassinnaasumik nassarnissaq kisiat piumasaqaataavoq.