Malimmi nalussuataarit

Ukioq kingulleq nalulluni unammisoqarmat Nuuk normu 10-ngorpoq. Illoqarfiit pingasut naluffiunerpaasimasut aningaasanik akissarsitinneqartarput. Ilimanarpallaanngilarli Nuuk illoqarfiit pingasut naluffiginerpaat akornannut ilanngukkumaartoq, tamatumunnga pissutaavoq Nuup illoqarfiata angivallaannginnera, ukioq kingullerli normu 10-ngorsimaneq ukioq manna aamma anguneqarsinnaassasoq neriunartoq unammititsinermi Nuummi aaqqissuussisut isumaqarput.

-Ukioq kingulleq ’Danmark svøm langt’ ingerlanneqarmat ingerlalluarnerpaavoq. Inuit 150 aaqqissuussinermi peqataammata 250 kilometerit naluttoqarpoq. Sulissutigerusupparput naatsorsuutigalugulu tamanna aamma ukioq manna angussagipput. Nalulluni unamminerup 6 tiimit ingerlanerani inuit amerlanerusut peqataassasut kilometerillu amerlanerusut  nalunnermi anguneqarumaartut neriuutigaarput, taama Naluttarfik Malimmi halinspektøri Per Thomsen oqarpoq.  

Naluttarfimmi Malimmi nalulluni unammisitsineq naluttarfimmi mikinermi anginermilu ingerlanneqassapput, taamaalillutik nallorissut nalunnermullu pikkorippallaanngitsut unamminermi peqataasinnaassapput. Unamminermi peqataasut tamarmik peqataasimanermut uppernarsaammik allagartamik tunineqassapput, tassani allaqqassaaq ulloq taanna qanoq takitigisumik nalussimanersut.

- Nuummi innuttaasut amerlanerpaartaat massakkumut naluttarfimmeereernikuupput, ullorli taanna nalukkiarneq ullaakkut arfinerniit nal.12.00 tungaanut akeqassanngilaq, taamaalilluni inuit nalukkiarpiarneq ajortut periarfissinneqassapput nalukkiarnissaminnut. Neriuutigaara ukioq manna aaqqissuussinerput ukioq kingullermitut iluatsilluartigisumik ingerlassasoq. Ullaarnaniit inuit tikilluaqqusaapput. Aaqqissuussineq illoqarfigisami qanoq ingerlanersoq Internettikkut malinnaaffigineqarsinnaavoq, taama Per Thomsen knr.gl-imut oqarpoq.

Naluttarfik Malik pillugu paasisaqarnerorusukkuit uunga paasisassarsiorsinnaavutit: http://malik-nuuk.gl/home/

Sapaatiuppat  oktobarip 7-ani unammisitsineq malinnaaffigerusukkukku uani ullaarnaniit malinnaasinnaavutit: www.svoem.dk