Maliina: Tamaasa isumagisinnaanngilagut

Kalaallit Nunaata innarluutilinnik tamanik isumaginnilernissaata qaqugu pinissaa Isumaginninnermut Naalakkersuisup Maliina Abelsenip ukiulerusunngilaa.

Kalaallit innarluutillit Danmarkimut aallartinneqartarnerat kukkuneruvoq, Kalaallit Nunaatali piffissami naalakkersuisoqarfiusumi matumani innarluutillit tamaasa isumagilernavianngilai, isumaginninnermut naalakkersuisoq Maliina Abelsen aviisimut Informationimut taama nassuerpoq.

Taassuma erseqqissarpaa, tamanna Kalaallit Nunaata ukiut 20-t sinnerlugit anguniagarisimagaa.

- Innuttaasut tamaasa pitsaanerpaamik neqerooruteqarfigerusuppavut, kisiannili sullissiveqarfiit naleqqussakkat pigineqartussat tamatigut pigineqaratik. Taava nunamut allamut nuunnermi misigissutsikkut kulturikkullu allanngoriataarnerit annertuut pillugit neqeroorutit pitsaasut pissarsiarineqarnissaat ajornerussanersoq oqimaaqatigiissitsisoqartariaqarpoq, taanna aviisimut taama oqarpoq.

Maliina nammineq aasaq Slagelsemiippoq Danmarkimi kalaallit 100-t inissinneqarsimasut ilaat pulaarlugit. Isumaqanngilarli taakkua Kalaallit Nunaannut utertinnissaat pinngitsoorani aaqqiissutissaasoq eqqortoq.

- Inuit ilaat ukiut 40-t sinnerlugit Danmarkimi najugaqarsimapput, taamaalillutalu pisut ataasiakkaarlugit nalilersuisariaqarluta taakkua angerlamut utertinneqarnissaat iluaqutaajumaarnersoq, Maliina Abelsen oqarpoq.

Taamaattorli nassuerutigaa Kalaallit Nunaat allatut ajornartumik allatut iliorluni neqeroorutinik piukkunnartunik ujaasissasoq, qallunaat sullissiveqarfiinit ilaarsiinnarani.

- Issiaannarsinnaanngilagut ilinniarsimasunillu naammattunik sulisoqalernissaanut utaqqillutalu. Periarfissat allat annikinnerusumik ilinniarsimasut atorlugit pissuserissaarnikkut suliamullu isumannaatsumik neqeroorutiliornissat misissortariaqarpavut, Maliina Abelsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat