Maliina Abelsenip meeqqat oqaloqatigiittarfeqartariaqarsorai

Maliina Abelsen isumaqarpoq Meeqqat Inuusuttullu Pillugit Ilisimasaqarfiup MIPI-p misissuinera qujarunnartoq, taassumami takutippaa, Kalaallit Nunaanni meeqqat 1.248-t pineqaatissinneqarsimasunut inissiisarfianniissimasunik angajoqqaaqartut.

-Meeqqat pinerluuteqarsimasunik angajoqqaallit atugarliuuteqalersarput, taamaammat oqallisaalernera qujanarpoq, Maliina Abelsen oqarpoq

-Qujanaqaaq taama nalunaarusiortoqarmat, meeqqammi pinerluuteqarsimasunik angajoqqaallit imminut mattunneq, kanngusunneq pisuutinnerlu atugarilersarpaat. Meeqqat isumaqartarput nammineq kisimik taama misigisaqartuullutik, Maliina Abelsen oqarpoq.

MIPI-p misissuinerata ersersippaa meeqqat 14-iugaangata ataaseq pineqaatissinneqarsimasumik angajoqqaaqartartoq. Nunarsuarmi misissuinerit takutittareerpaat, meeqqanut nikallungarujussuarnermik, pinerloqqajaanermik, kamannermik inuillu allat akornaniikkusunnginnermik kinguneqartartoq. Maliina Abelsen isumaqarpoq, meeqqat pineqaatissinneqarsimasunut inissiisarfimmiissimasunik inissiisarfimmiittunilluunniit angajoqqaallit ataatsimut oqaloqatigiittarfeqarnissaat pisariaqalersoq.

Pineqaatissinneqarsimasunut Inissiisarfimmiinneq angajoqqaajusunut aamma artornartarpoq. Nuummi pineqaatissinneqarsimasunut inissiisarfimmiittup meeqqani marlunnik affarmillu ukiullit Paamiuni najugallit maqaaseqai, kingullermimmi qaammatit pingasut matuma siornagut takuai.

- Ajortorujussuuvoq, sussaanngilaq. Niaqulaarnalaartupilussuuvoq, suaraarannguaq isumalussutaasinnaavoq. Tamaani aamma susassaqarpiannginnatta, nassuiaavoq.

Oqarpoq maanna meeqqamik anaanaata meeqqanik kisimiilluni perorsaanini sungiukkiartoraa.

-Qujanartumik, kisianni tamatta sakkortunaarparput. Ajorpoq. Unnersuussassaanngilaq. Allaanngilaq tikeqqissanagit. Allaanngilaq ipisagaannaannguakasiit ilaat uanga tamaani, nangippoq.

Angut aterminik taaseqqusinngitsoq persuttaanermut tillinniarnernullu atatillugu pineqaatissinneqarsimasunut inissiisarfimmiititaavoq. Meeqqami, pingaartumik angajulliup misigissusai nammineq nalunngilluarpai, namminermi ataataa aamma pinerluuteqarsimanini pillugu pineqaatissinneqarsimasunut inissiisarfimmiippoq.

- Aamma uanga ataataga parnaarussivimmeeqatigaara. Ilumoorpoq meeqqat allamik pissusilersortarnerat. Uuminalaartupilussuuvoq, uanga ernera eqqaassagukku qimaqqaaratta ataatagussuataarsimavoq meeqqerivimmi kimmaasalerluni. Soorlu tamakkukujussuit eqqaasinnaavakka. Meeqqap pissusaa taamaassinnaagami, pineqaatissinneqarsimasunut inissiisarfimmiittoq oqarpoq.

Isumaginninnermut naalakkersuisup Maliina Abelsenip neriuutigaa, Nuummi matoqqasumik parnaarussiveqalerpat, meeqqat pinerluuteqarsimasunik angajoqqaallit atugaat aamma eqqarsaatigineqarumaartoq. Maliina Abelsenip pingaartuunerarpaa, meeqqap pisariaqartitaasa qulaajarnissaat.