Isumaginninnermut naalakkersuisoq Maliina Abelsen (IA) oqarpoq "tikilluaqqunassasoq" qallunaat naalakkersuisui innuttaasunut kalaallinut utoqqatsissuteqassappata.
Taassuma isumaa naapertorlugu tamatumani meeqqat 22-t filmimi "Eksperimentet"-mi, Tine Bryldip atuakkiaa naqiteqqinneqartoq "I den bedste mening" najoqqutaralugu suliarineqartumi pinngitsaaliissummik nuutsitaasut kisimik pineqassanngillat.
- Kalaallit meerartaat ilaqutariillu allat amerlaqisut taamaangajattunik nalaataqartarput politikkeqarnerullu kukkusup kingunerisaanik amiilaarnartunik naammaginniinnartariaqartarlutik, Maliina Abelsen Ritzau-imut taama oqarpoq.
Flemming Møllerip, Venstreni Kalaallit Nunaannut tunngasunut oqaaseqartartup pisortatigoortumik utoqqatsissuteqarnissamik itigartitsinera Maliina Abelsenip tunngavigaa. Oqaaseqartartoq taanna aviisimut sermitsiaq.ag-mut oqarpoq kalaallinut meeqqanut iliuuseqarsimaneq 1950-ikkut aallartinneranni oqartussaasut ilisimasaannik tunngavilik pissuserissaarnerunngitsutut isumaqarfigalugu saassunneqarsinnaanngitsoq.
Taama isumaqarneq Maliina Abelsenip akerleraa.
- Kisiannimi utoqqatsissuteqarnissaq akeqanngilaq sapiissusermilli ersersitsinerinnaassalluni. Isumaqarpunga tamanna tamakkuninnga nalaataqarsimasunut assorsuaq pingaaruteqartussaassasoq, qallunaat naalakkersuisuisa taakkua tamaasa pisortatigoortumik utoqqatsiissuteqarfigissappatigik, Maliina Abelsen isumaqarpoq.