Maliina Abelsen: Siulersuisuni arnat amerlanerit

Suliffeqarfinni namminersortunit pigineqartuni siulersuisuni arnat ilaasortatamerlanerulerpata naligiissitaaneq Nunatsinni annertusissagaluarpoq. Arnat angutillu atorfinitsitsinissami amerlassusiligaanissaannut Isumaginninnermut naalakkersuisoq, Maliina Abelsen, ammavoq:
apriilip 03-at 2010 16:49

Nunatsinni suliffeqarfinni namminersortunit pigineqartuni siulersuisut ataatsimiikkaangata angutit tassaakkajunnerusarput issiaqataasut. Tuniniaanermulli siunnersortip Nini Biilmannip oqarnera naapertorlugu, arnat siulersuisuni amerlanerusariaqalerput. Nini Biilmannip Radioaviisimi qanittukkut siunnersuutigaa, arnat angutillu atorfinitsitsinissami amerlassusiligaanissaat eqqarsaatigereerlugu siulersuisuni ilaasortat toqqarneqartassasut. Isumaginninnermut Naalakkersuisup, Maliina Abelsenip, isuma ajoriffissaqartinngilaa:

- Apeqqut soqutiginaqaaq - uanga sumerpiaq inissisimanerlunga naluara - kisianni isuma isumatusaarneruvoq, kisianni soorlu oqareersunga arnaanera angutaaneraluunniit pissutigiinnarlugu qinertariaqanngillat, tassami angutit angutinik toqqaasarput, uagullu arnat toqqarusunnerusarpavut, assiginerugatsigimmi. Taamaammat immaqa anneruniarnerussaaq oqassalluni, arnanik piukkunnartoqanngitsoq, uanga isumaqarpunga arnanik Nunatsinni piukkunnartorpassuaqartoq. Aamma qissimigaarneqarsinnaavoq nunani allani qanoq iliortarsimanersut, taava oqallisigalugu qanoq iliorsinnaanerluta. Aamma apeqqutaassaaq suliffeqarfinni sorlerni siulersuisut pineqassanersut, sunillu suliaqarnersut.

Arnat angutillu atorfinitsitsinissami amerlassusiligaanissaannut isuma Maliina Abelsenip eqqarsaatigalugu suli naammassinngikkaluarlugu, neriorsuisinnaavoq siulersuisuni ilaasortat ukiut marluk qaangiuppata allatut isikkoqalersimassasut, Maliina Abelsen oqarpoq. Nangipporlu:

Eqqaamavara suliffeqarfinni namminersortunit pigineqartuni siulersuisunut ilaasortat 83 procentii ukiut marluk matuma siorna angutaasut. Tamanna qimattariaqarparput, oqarsinnaavungalu ukiut marluk qaangiuppata allatorujussuaq isikkoqassaaq.