Maliina Abelsen niuernermi pisortatut atuuffimminit soraartoq

Maliina Abelsenip Air Greenlandimi atuuffimminit, ukiut pingasut sinnilaarlugit atorfigisimasaminit soraarnissani piffissami sivitsortumi isumaliutigereerlugu qimallugu Facebookikkut ataasinngornermi nalunaarutigaa.

- Ulluinnanni eqaatsumik periarfissaqarusullungalu piffissaqarusuppunga. Aalajngiininnut atatillugu pissangavunga ernumallungalu sapiitsutullu misigisimallunga, Maliina Abelsen allappoq.

Air Greenlandip pisortaanera, Jacob Nitter Sørensen Maliinap soraarniarnera pillugu ima oqarpoq:

- Maliina Abelsen suliffeqarfiup nunatsinni attanneqarsinnaasumik ineriartortitsinissamut iliuusissatut pilersaarutinut tapersiisunik angusaqarnissamik pilersitseqataasimavoq. Maliina maqaasissavara, aalajangernerali soorunami ataqqivara siunissamullu ajunnginnerpaamik kissaallugu.

Maliina Abelsen Air Greenlandimi atorfininngikkallarami Arctic Winter Gamesip Nuummi 2016-imi ingerlanneqarnissaanut siuttuusimavoq. Tamatumalu siorna Inatsisartuni Naalakkersuisunilu ilaasortaasimavoq, aningaasaqarnermullu naalakkersuisuusimalluni.