Maligassiuisut show: Asii Kleist Berthelsen nersorniaqqippaat
Arsaanermi piukkunnaateqarluartoq Asii Kleist Berthelsen pikkorinnerni timersornermi takutitsilluarnerpaatut toqqarneqarpoq timersullammannik nersornaasiineq tv-mi toqqaannartumik aallakaatinneqartoq pimmat. Timersornermi aamma suliniuteqarluartut suliaminnik maluginiarneqarluarnermik takutitsivigineqarput.
Ukiormanna nersornaatisisut
Ukiumi timersullammaat: Assammik arsarnermi arnat nunanut allanut unammisartut
Ukiup siulersuillammak Lena Ravn Davidsen, Nagdlúnguak Ilulissat
Ukiumi siulersuillammak: Ole Kûitsi, ATK 92 Aasiaat
Ukiumi suliniummik saqqumilaartitsilluartut: SSP sisoraatinik oqilaniuttartut, Sisimiut
Paarisap nersornaasigai
Ukioq manna atuarfik eqeersimaartoq: Tasersuup atuarfia Qaqortoq
Ukioq manna suliffik eqeersimaartoq: Mittarfeqarfiit Nuuk
Ukioq manna inuiaqatigiinni eqeersimaartoq: Jens M. Larsen, Attu
Elite Sport Greenlandip nersornaasiutai:
Timersornermi takutitsilluarnerpaaq: Asii Kleist Berthelsen, Hjørring
Piukkunnaatilinnik ineriartortitsilluarnerpaaq: B-67 Badminton Nuuk
Siorna timersullammattut toqqagaasoq Asii Kleist Berthelsen erseqqissumik oqariartuuteqarpoq pikkorinnerni takutitsilluartutut nersornaaserneqarnermut qujassuteqarnermini.
- Siorna aamma nersornaaserneqarpunga assullu taama pineqarnera nuannaarutigaara. Kisianni aamma tassani takuneqarsinnaavoq amerlanerusariaqaraluartut aallarlutik misiliisut, Asii Kleist Berthelsen qallunaat U-19-ni nunanut allanut unammisartuini takutitsilluaqattaartoq oqarpoq.
Timersullammanngortut aamma sivisuumik angalapput.
Tassaapput assammik arsarnermi arnat nunanut allanut unammisartut VM-mut anngunniunnerminni augustip qaammataani finalemut annguttut.
- Nersornaatisineq anguniakkatta anguniarnissaanut nukissanik assut tunisivoq – tassa VM-mut annguteriarnissamut, nunanut allanut unammisartoq Ivaana Holm KNR-mut oqarpoq.
Nunaqqatigiinni sullissilluartut aamma nersornaatisipput.
Aqutsisuullammanngortoq 50-nik ukiulik Lena Ravn Davidsen timersoqatigiiffimmi Nagdlúnguami 14-nik ukioqarlunili nammineq piumassutsimik suliniaqataalerpoq maannalu ukiut qulit sinnerlugit siulittaasuulluni.
Sungiusaallammanngortoq Ole Kûitsi Aasianni taekwondomi ukiut arlallit sungiusaasuuvoq assullu pingaartitaralugu sungiusakkami inoqatiminnut ataqqinnittuunissaat.
Pikkorinnernernik inerisaalluartoq B-67 badminton nunanut allanut unammisartoqarneq aallartimmalli nunanut allanut unammisartussanik pilersuisuuvoq. Peqatigiffiup ingerlalluarnera meeqqanik inuusuttuaqqanillu suliniarnermi tunngavilerneqarpoq piukkunnaateqartorpassuillu ukiut ingerlaneranni tassani takkuttarput.
Nersornaat nutaaq tassaavoq suliniummut ambassadøri. Taamatut tunineqartut tassaapput SSP-mi Sisimiuni sisoraatinik oqilaniuttartut peqatigiiffiup timimik aalatitsinissamik aaqqissuussisarnera nersorniarneqarmat. Taamatut aamma nersornaasiisoqarpoq GIFp anguniagaa tassalu 2030-mi nunarsuarmi timimik aalatitsinerpaanngorsimanissamik suliniut saqqumilaartinniarlugu.
Nersornaatisisut aqqi takussutissiami talerpiatungaani takusinnaavatit.