Maleruagassat sukaterneqarnissaat EU-mit kissaatigineqarpoq

Uuliamik maqisoortoqassagaluarpat, soorlu Mexicop Kangerliumanersuani taama pisoqartoq, isumannaallisaanermut taarsiissuteqarnissamullu maleruagassat sukaterneqarnissaat, EU-mi Inatsisartut kissaatigaat.
oktobarip 08-at 2010 10:33

Isumaliutissiissummili, Inatsisartut ippassaq akuerisaanni, immani itisuuni qillerinissap inerteqqutigineqalernissaa kajumissaarutigineqanngilaq.

EU-mut attuumassuteqartuni immani itisuuni qillerisarnerup aarlerinarnerulersimanera oqallinnermut pissutaavoq.

Taamaammat immani itisuuni qillerisarnerup inerteqqutaalluinnalernissaa EU-mi Inatsisartuni Avatangiisit pillugit ataatsimiititaliap nalinginnaasumillu ilaasortarpassuit kissaatigigaluarpaat. Inatsisartunili ilaasortat amerlanerussuteqartut isumaqarput, taamaaliussagaluarunik tamanna ingasattajaarneruallaassasoq.

Avatangiisilli pillugit Europami inatsisit uuliasiorfinnut atuutinnginnerat ilaasortat ernumanartoqartippaat, taakkunani allassimanngimmat mingutsitsisut mingutsitsinertik namminneq akilissagaat.

Europap imartaani annertuumik uuliakoortoqaraluarpat tamanna aalisarnermik inuussutissarsiuteqartunut takornariaqarnermullu ajunaarnerussaaq annertooq, taamaammallu inatsisartunut ilaasortat eqqarsaatigaat Europami sillimmasiinermut, imaluunniit ajunaarnersuaqartillugu atugassanik aningaasaateqarfimmik pilersitsinissaq pisariaqalinnginnersoq.

Qillerivinni isumannaallisaanissamut tunngasut, EU-mi ikummatissanut ministerit Luxembourgimi oktobarip 15-ianni ataatsimiilerunik oqallisigissavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq