Maleruagassat naapertorneqarput
Ineqarnermut, Attaveqarnermut Angallannermullu Naalakkersuisoqarfiup isertuussamik Naalakkersuisunut allagaqaateqarnerani atuarneqarsinnaavoq Naalakkersuisut najugaqarfii sisamat najugaqarfigineqanngitsut tunineqartariaqartullu, imaluunniit isaterneqarlutillunniit sanaqqinneqartariaqartut.
Isertuussisoqartariaqarneralu ima nassuiaatigineqarpoq:
- Tupinnartuliaanngilaq, asuli pinerunani demokratiimilluunniit sumiginnaanerunngilaq Aningaasaqarnermut Ataatsimiititaliami aningaasaliissuteqarnissamik suliassaq isertuussassaagaluartutut suliarineqarpat. Tamannami naapertuilluartumik nassuiaatissaqarpoq. Suliassamut matumunnga ilaavoq illumik aalajangersimasumik pisinissamut aningaasaliissuteqarnissamik qinnuteqaat. Ingerlaannaq tamanna saqqummiunneqarsimagaluarpat illumik pineqartumik pisinissaq annertuumik akitsorsarneqarsinnaasimassagaluarpoq, illumik tunisisussap pisisussamut aningaasatigut killissaritinneqartut ilasimassagaluarpagit, Aningaasaqarnermut Ataatsimiititaliap siulittaasua Andreas Uldum allappoq.
Aningaasaliissutit qinnutigineqartut akuerineqartullu ima amerlatigisutut aamma oqaatigineqarsinnaanngillat Aningaasaqarnermut Ataatsimiititaliaq akuersissuteqarnissaminut tunuarsimaarsimasariaqaraluarluni, Andreas Uldum allappoq, nangillunilu:
- Sanilliullugu assersuutitut oqaatigineqarsinnaavoq ataatsimiititaliaq atuartut angerlarsimaffiinik ilinniartullu inissaannik sanaartornissamut 2011-mi decembarimi katillugit 140 millionit koruunit sinnerlugit aningaasartalimmik aningaasaliissuteqartoqarnissaanik qinnuteqaammik akuersissuteqarmat sunnguamiluunniit ataatsimiititaliamit, innuttaasunit naalakkersuisunilluunniit oqaaseqartartunit uparuarneqanngitsumik, Andreas Uldum allappoq.
