Maleruagassaq ilinniarusukkaluanik nangaatitsilersinnaavoq

Maleruagassamit akornuserneqartut ilagaat Sisimiuni ilinniartut ilinniarnerminnut atatilugu Nuummut atuariartortut meeqqamik paarineqarnissaannut aningaasanik ikiorsiiffigineqarsinnaanngitsut. Sisimiut kommuneani inunnik isumaginninnermut pisortaq, Gunnar Vinge, oqarpoq, maleruagassaq ilinniarusukkaluartunik nangaatitsilersinnaasoq.

Maleruaqqusaq ukioq manna aprilip aallaqqaataani atuutilersoq malillugu ilinniartut ikiorsernissaannut periarfissaqanngilaq. Taamaammat Kultureqarnermut Ilaqutariinnulu Qullersaqarfiit saaffiginikuuagut, taakkualu nassuerutigaat maleruaqqusaq malillugu ilinniartut siornatigutuut aningaasatigut ikiorserneqarsinnaanngitsut. Ilinniartut ikiorsersinnaaniarlugit Sisimiut kommuneaniit aningaasanik taarsigassarsitittarpavut, immikkoortitaarlugillu qaqugu taarserneqassanersut isummerfigisarpavut. Uanga nammineq isumaqarpuga maleruaqqusap akornusiisarnera uggornartuusoq. Aningaaserivittut iliortussaanngikkaluarpugut, ilinniaqqusiutigalunili akornusersuisarneq arlaatigut aaqqiiffiginiartariaqaratsigu taarsigassarsititsisarpugut. Inuusuttortagut ilinniaqqoriarlugit oqarfigisinnaanngilagut taperneqarsinnaanngitsut, Gunnar Vinge oqarpoq.